स्पष्टिकरण बिवाद सहमति कथं ज्यंकेमाः : खनाल
एमाले अध्यक्ष झलनाथ खनालं प्रधानसेनापतियात काःगु स्पष्टिकरण प्रकरणयात राजनीतिक सहमति कथं ज्यंकेमाःगु खँ धयादीगु दु ।
सेनापति प्रकरणं गम्भीर मोड कायेवं चीन भ्रमण यात चीहाकः याना बिहिवाः देय् लिहांझयादिम्ह खनालं त्रिभुवन अन्तराष्ट्रिय विमानस्थलय् संचारकार्मीत नाप खँल्हानादिसें राष्ट्रिय सेनाया बारे हथाय्सं निर्णय यायेमज्यू धयादिल । राष्ट्रिय सेनाया सम्मान व मर्यादाय् आँच वइगु कथंया ज्याखँ सुना नं यायेमज्यूगु खँय् एमाले स्पष्ट जूगु धयादिल । प्रधानसेनापति प्रकरणय् पार्टी दुने आन्तरिक बिबाद बारे सहलहलिपा सहमति जुइगु विश्वास प्वंकादिल ।
वयेक लिहांझयेवं पार्टी ज्याकू बल्खु वनाः एमालेया शीर्षस्थ नेतातनाप थ्व प्रकरणय् सहलह यानादीगु दु । स्वनिगःलय् उपलब्ध केन्द्रीय नेतातय्सं अध्यक्ष खनालया चीन भ्रमणलिपा देशय् उत्पन्न घटनाक्रम बारे जानकारी ब्यूगु खः । थ्व बारे विस्तृत सहलह याना निष्कर्षय् थ्यंकेत शुक्रवाः सुथय् केन्द्रीय दुजः व न्हिनय् प्यताः ईलय् स्थायी कमिटीया बैठक सःतुगु दु ।
