'माओवादीया आत्मा शान्ति यायेत राजीनामा'
प्रधानमन्त्री माधवकुमार नेपालं माओवादीया आत्मा शान्तिया निंतिं जक थःम्हं राजीनामा बियागु खँ धयादीगु दु । वय्कलं माआवादीं राजीनामा बीवं हे समस्या समाधान जुइगु दाबी याःगुलिं उकीया जिम्मेवार नं माओवादी हे जूगु द्वपं बियादिल ।
प्रेस चौतारी मोरङं मंगलवाः विराटनगरय् याःगु पत्रकार सेम्मलेनय् वय्कलं कन्हय् जुइगु झिक्वःगु चरणया प्रधानमन्त्रीया निर्वाचनं पाखें नं छुं उपलब्धी मजुइगु धयादिल । शान्ति व संविधानया ताःचा माओवादी नाप व सरकारया ताःचा कांग्रेस नाप दुगु धयादिसें प्रधानमन्त्री नेपालं ताःचा सुया ल्हातय् दु वं हे ताःफ्वः चायेकेमाःगु धयादिल ।
राजनीतिक कारणं यानाः हे देय्या अर्थतन्त्र धराशायी जुयाच्वंगु प्रति प्रधानमन्त्री नेपालं दुःख प्वंकादिल । वय्कलं सरकार नं गठन याके मबीगु व न्हूगु बजेट नं ह्येमबीत जुयाच्वंगु कासा प्रति नं आक्रोशित जुयादिल । थुगु हे प्रक्रियां निरन्तरता काःसा देय्या अर्थतन्त्र धरायशी जुइगु ख्याच्वः नं प्रधानमन्त्री नेपालं बियादिल ।
