उम्मेदवारी कायम तःसा गैरजिम्मेवार : प्रकाश
एनेकपा (माओवादी)या उपाध्यक्ष नारायणकाजी श्रेष्ठ 'प्रकाशं' नेपाली कांग्रेस पाखें प्रधानमन्त्रीया उम्मेदवार रामचन्द्र पौडेलं उम्मेदवारी कायम तःसा गैरजिम्मेवारी जुइगु खँ धयादीगु दु । वय्कलं उम्मेदवारीयात निरन्तरता बियाच्वंसाः देशय् संकट वइगु नं ख्याच्वः बियादिल ।
क्रान्तिकारी पत्रकार संघ चितवन शाखां मंगलवाः भरतपुरय् याःगु पत्रकार सम्मेलनय् वय्कलं प्रधानमन्त्री निर्वाचनय् याकःचा जुम्ह पौडेलं द्वछिक्वः तक निर्वाचन जुसां त्याकेमफइगु धयादिल । जारी निर्वाचन पाखें प्रधानमन्त्री ल्यये मफइगुलिं सभामुखयात थःपिंसं विशेष आधिकार छ्यलेत इनाप यानागु धयादिल ।
उम्मेदवारी लितकायेत कांग्रेसं तःगु सर्त पाखें झन जटिलता अप्वइगु धयदिसें प्रकाशं दक्वं दलत च्वनाः सहलह यानाः निष्कर्ष पिकायेमाःगु धयादिल । वय्कलं मोहनी न्ह्यः हे न्हूगु सरकार गठन यानाः उगु हे सरकारं बजेट ह्येमाःगु धयादिल ।
