नेवाः एकता दिवस पुष ११ गते हनीगु
यल (सन्ध्या टाइम्स)/नेवाःतय्सं नेवाः स्वायत्त राज्य घोषणा याःगु न्हि पुष ११ गतेयात थुगुसी नेवाः एकता दिवस कथं हनीगु जूगु दु ।
नेवाः स्वायत्त राज्य मंकाः संघर्ष समितिया ग्वसालय् म्हिगः यलय् जूगु विस्तारित बैठकं उगु निर्णय याःगु खः। अथे हे पुष ११ गते न्ह्यः हे देय्न्यंकंया नेवाःतय्त दुथ्याकाः नेवाः राजनीतिक सम्मेलन यायेगु निर्णय नं बैठकं याःगु दु ।
अथे हे उगु बैठकं वइगु २६ गते येँय् राजनीतिक दलया शीर्ष नेतातय्त ब्वनाः थौंया राजनीतिक परिस्थिति व नेवाः स्वायत्त राज्यया सम्बन्धय् विशेष बिचाः गोष्ठी यायेगु खँ नं अनुमोदन याःगु दु। उगु गोष्ठीइ एकीकृत माओवादीया अध्यक्ष प्रचण्ड, नेपाली कांग्रेसया सभपति सुशिल कोइराला व एमालेया अध्यक्ष झलनाथ खनाल, नेपाः राष्ट्रिय पार्टीया नायः डा. केशवमान शाक्यपिंसं न्ववानादीगु खँ धाःगु दु ।
संघर्ष घोषणा यायेत थौं मुँज्या
नेवाः स्वायत्त राज्य मंकाः संघर्ष समिति मध्यपुर थिमि लागाया थौं बहनी मुँज्या च्वनाः संघर्षया ज्याझ्वः तयार याइगु जूगु दु। मंकाः संघर्ष समिति थिमि लागाया नायः कृष्णलाल गोजां थौं सुथय् च्वनेगु धाःगु मुँज्या प्राविधिक कारणं बहनी जक च्वनेगु जानकारी बियादीगु दु। नेवाःतय्गु माग पूरा याकेगु नितिं बियागु अल्टिमेटमया ई क्वचायेधुंकाः तक नं उकियात संवोधन मयाःगुलिं बाध्य जुयाः आन्दोलनय् कुहां वनेमाःगु खँ नं समितिं न्ह्यथंगु दु ।
