मध्य व सुदूरपश्चिमय् चक्का जाम
येँ (सन्ध्या टाइम्स)/चालक ओकिल बुढाथोकीयात स्याना बिउगु विरोधय् यातायात व्यवसायीतय्सं थौं मध्य व सुदूरपश्चिमय् यातायात बन्द आह्वान याःगुलिं अनया जनजीवन प्रभावित जूगु दु ।
बन्द आह्वान यानातःगुलिं राप्ती, भेरी, कर्णाली, सेती व महाकाली अञ्चलय् यातायात ठप्प जूगु दु। मोहनि नखः न्ह्यः गाडी बन्द याःगुलिं मोहनि माने यायेत छेँय् वनाच्वंपिं मनूतय्त सास्ती जूगु दु। थःपिनि माग पूरा मजूगुलिं बन्द आह्वान यायेमाःगु खः धकाः अखिल नेपाल यातायात मजदूर संघं धाःगु दु। नेपाल यातायात व्यवसायी राष्ट्रिय महासंघं थौं हे येँय् पत्रकार सम्मेलन यानाः संघर्षया थप ज्याझ्वः घोषणा याइगु जूगु दु ।
वंगु भदौ २७ गते सुर्खेत बसया ठक्करं स्थानीय छम्ह मचा सीवं अनया मनूतय्सं चालक बुढाथोकीयात भेरी खुसिइ वांछ्वया बिउगु खः। यातायात व्यवसायीतय्सं मदुम्ह चालकया छेँजःयात २० लाख तका क्षतिपूर्ति बीमाःगु, वया मस्तय्त निःशुल्क आखः ब्वंकेगु व्यवस्था यायेमाःगु, तोडफोड जूगु बसया क्षतिपूर्ति बीमाःगु नापं मेमेगु माग तयाः आन्दोलन याना वयाच्वंगु खः ।
