प्रधानमन्त्रीं च्यागू देय्या राजदूतनाप सहलह
प्रधानमन्त्री पुष्पकमल दाहालं नेपालय् महत्वपूर्ण प्रभाव तइगु च्यागू देया राजदूतनाप प्रधानसेनापतिया स्पष्टिकरण व देय्या समसामयिक विषयलय् सहलह यानादीगु दु ।
प्रधानमन्त्रीया ब्वनाय् बिहिवाः सुथय् बालुवाटारय् जूगु सहलहलय् राजदूततय्सं राष्ट्रिय सहमति याना जक स्पष्टिकरण प्रकृयायत न्ह्यने यंकेत सुझाव ब्यूगु खः । उगु सहलहलय् प्रधानमन्त्री दाहालं सेना हस्तक्षेप यायेगु छुं नं मनसाय मदुगु खँ अन्तराष्ट्रिय समुदायात स्पष्ट यायेगु कुतः यानादीगु खः । वयेकलं स्पष्टिकरण माग याःगु खँ यात गलत ढंगं व्याख्या या:गु खँ धयादिल ।
राजदूततनापया सहलहलिपा अर्थमन्त्री डा. बाबुराम भट्टराईं सत्ता कब्जा याना एकदलीय शासन लागू यायेत माओवादीं स्वःगु धइगु कांग्रेसं प्रचार यानाच्वंगु भ्रमयात चीकेत विदेशी कुटनीतिकज्ञतय्त सामूहीक रुपं सःताःगु धयादिल । नागरिक सर्वोच्चता कायम यायेत सरकारं ल्ह्वनीगु पलाःयात कुटनीतिकतय्सं समर्थन याःगु व उकीयात राष्ट्रिय समर्थन जुइमाःगु खँ वय्किपंसं बः ब्यगू खँ मन्त्री भट्टराईं नं कनादिल ।
सहलहलय् भारत, चीन, अमेरिका, जापन, बेलायत, नर्वे, जर्मनी व फिनल्याण्डया राजदूततय्सं सामूहिक रुपं प्रधानसेनापतियात काःगु स्पष्टिकरण प्रकरण, देशय् उत्पन्न राजनीतिक गतिरोध व उकीं शान्ति प्रक्रियाय् लाकेफुगु प्रभाव लगायतया बारे बीचाः प्वंकादीगु खः ।
