ब्लड डोनर्सया झिंप्यक्वःगु तःमुँज्या
येँ (सन्ध्या टाइम्स)/ब्लड डोनर्स एशोसियसन नेपाल (ब्लोदान)या झिंप्यक्वःगु तःमुँज्या वंगु असोज १६ गते नेपाल चेम्बर अफ कमर्सया भवन जमलय् क्वचाल। ब्लोदानया अध्यक्ष महेन्द्र विलास जोशीया सभापतित्वय् जूगु उगु ज्वलय् प्रहरी नायव महानिरीक्षक विज्ञानराज शर्मां ज्याझ्वःया उलेज्या यानादीगु खः। वय्कलं गुगुं नं आपत्तिजनक अवस्थायात ध्यानय् तयाः हिदानया प्रचार प्रसार व महत्वयात समाजय् प्रचार याना वनेमाःगु खँ कनादिल। ज्याझ्वलय् संस्थाया उपाध्यक्ष राजेश श्रेष्ठं हिदानया महत्वयात कुलादिल ।
संस्थापक अध्यक्ष शरद कसां सुरक्षित हि आः तक नं नेपाःया सन्दर्भय् हाथ्या जुयाच्वंगुलिं ब्लोदानं थःगु भूमिकायात अझ व्यापक यायेमाःगु खँ कनादिल। ब्लोदान रुपन्देही जिल्लाया उपाध्यक्ष विमल शाक्यं हिदातातय्त राष्ट्रिय रुपं सम्मान यायेमाःगु माग तयादिल। विश्व स्वास्थ्य संघया कार्यक्रम प्रतिनिधि डा. प्रकाश घिमिरें ब्लोदानं यानाच्वंगु ज्याया सराहना यानादिल। ज्याझ्वलय् सहकारी संघ येँया अध्यक्ष केबी उपेति, ब्लोदानया सल्लाहकार भरतलाल श्रेष्ठ, राममान श्रेष्ठपिंसं नं न्ववानादीगु खः ।
