पीयूष पदक व चैनलाकौल सिरपाः लःल्हात
यल (सन्ध्या टाइम्स)/नेपालभाषा एम.ए. परीक्षाय् दकलय् अप्वः ल्याः हयाः ताःलाःम्ह ब्वँमियात बीगु पीयूष पदक व मय्जुपिं मध्येय् दकलय् अप्वः ल्याः हयादीम्ह छात्रायात बीगु चैन लाकौल सिरपाः छगू ज्याझ्वःया दथुइ शुक्रवाः लःल्हात। नेपालभाषा केन्द्रीय विभागया प्रमुख प्रा. प्रेमशान्ति तुलाधरया सभापतित्य् मूपाहां शिक्षाध्यक्ष प्रा. डा. सूर्यलाल अमात्यं पीयूष पदक सानुराजा शाक्ययात व चैन लाकौल सिरपाः मय्जु अमृता महर्जनयात लःल्हानादीगु खः ।
विभागपाखें ओमकारेश्वर श्रेष्ठं लसकुस यानाः न्ह्याकूगु ज्याझ्वलय् दातापाखें डा. श्रीकण्ठलाल श्रेष्ठ, संस्कृति मन्त्रालयया सहसचिव जलकृष्ण श्रेष्ठ, प्रा. डा. सूर्यलाल अमात्य व ब्वँमिपाखें सानुराजा शाक्य व अमृता महर्जनपिंसं नुगःखँ कनादीगु खः ।
थ्वया नापं थुगुसीनिसें एम.ए. परीक्षाय् लिउ जुइम्ह मिसा ब्बँमियात बीगु कथं 'तारा लाकौल सिरपाः' व लियां लिउ जुइम्हेसित 'रजनी लाकौल सिरपाः' बीगु क्वःछिउ कथं मय्जु मिलन शाक्ययात तारा लाकौल सिरपाः लःल्हाःगु खः ।
ज्याझ्वलय् कुमारी प्रकाशनपाखें नं पदक व सिरपाः काःपिंत मेगु 'कुमारी पदक' लःल्हायेगु ज्या जूगु खःसा विभागपाखें विशेष सिरपाः विमल ताम्राकारयात लःल्हाःगु खः ।
