निगूलिं प्यानलं थःथःगु उम्मेदवारी घोषणा
अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)या नीक्वःगु राष्ट्रिय सम्मेलनय् निगू प्यानलं थःथःगु उम्मेदवारी घोषणा याःगु दु । जनकपुरय् जुयाच्वंगु सम्मेलनया प्यन्हुया न्हि थौं वर्तमान उपाध्यक्ष सोभियत ढकाल व वर्तमान महासचिव माधव दुंगेलं अध्यक्ष पदया निंतिं उम्मेदवारी घोषणा याःगु दु ।
एमाले अध्यक्ष झलनाथ खनाल समर्थित ढकालया पाखें शिवजी गुरुङ, नविना लामा, सुधीर साह, लक्ष्मण लम्साल व विजयविराज विष्टं उपाध्यक्ष पदय् उम्मेदवारी ब्यूगु दुसाः केपी ओली खेमाया ढुंगेलया प्यानल पाखें पदम गिरी, नवराज पौडेल, पवित्रा महतो, भीम राय व लीला रायं उपाध्यक्षया निंतिं उम्मेदवारी ब्यूगु दु ।
निर्धारित ई स्वयां स्वघौ लिबाक उम्मेदवारी संकलन याःगु ज्याझ्वलय् महासचिव व कोषाध्यक्षया निंतिं झ्वःलाक नरबहादुर धामी व दीपक गौतमं ढकाल प्यानलं व किशोर विक्रम मल्ल व रमेश आचार्यं ढुंगेलया प्यानलं उम्मेदवारी घोषणा याःगु दु । सचिव पदया निंतिं अशोक यादव, गौतम अधिकारी व परमेश्वर गौतमं ढकाल प्यानल पाखें व सरोज यादव, रचना खड्का व वचनबहादुर सिंहं ढुंगेल प्यानलं उम्मेदवारी ब्यूगु दु ।
अनेरास्ववियुं थःगु विधान संशोधन यानाः बहुपदीय प्रणालीलय् वंगुलीं ५म्ह उपाध्यक्ष व ३म्ह सचिव तयेगु निर्णय याःगु खः । उखे आरक्षण पाखे जनजाति, मधेसी व मिसायात छगू-छगू सिट छुटे याःगु दु ।
न्हूगु नेतृत्व व कार्य समितिया निंतिं कन्हय् सुथसिया ७ बजे निसें १२ बजे तक निर्वाचन जुइगु ज्याझ्वः दुसां सुरक्षाया हुनिं निर्वाचन लिपा मतगणना येँ हयाः जक याइगु जूगु दु ।
