दाहालयात ज्वंगु प्रति माओवादीया आपत्ति

एकीकृत नेकपा (माओवादीं) थः कार्यकर्ता सिन्धुलीया सह-इञ्चार्ज राजन दाहालयात बिना आधार ज्वनायंकूगु धासें आपत्ति प्वंकूगु दु । नेकपा (एमाले)या महासविच ईश्वर पोखरेलयात दच्छि न्ह्यः आक्रमण याःगु द्वपंलय् दाहालयात म्हिग सिन्धुलीं ज्वनायंकूगु खः ।

माओवादी प्रवक्ता दिनानाथ शर्मां सोमवाः छगू विज्ञप्ति पिथनादिसें राजनीतिक प्रतिशोधया मनसायं बिना पूर्जी दाहालयात ज्वनायंकूगु धासें बिना सर्त त्वःतेत माग याःगु दु । शर्मां दाहालयात म्हिग सिन्धुलीं ज्वना रामेछाप थ्यंकूगु खँ नं न्ह्यथंनादीगु दु ।

विज्ञप्ति माओवादी व एमाले दथुइ सहमितया वातावरण निर्माण जुयाच्वंगु इलय् एमाले दुने सहमति विरोधीतय्सं षड्यन्त्र यानाः दाहालयात ज्वंकूगु पार्टी ठहर याःगु खँ न्ह्यथनातःगु दु ।