इलय् हे संविधान निर्माण जुइगु खँय् आचार्यया शंका

संवैधानिक समितिया सभापति निलाम्बर आचार्यं इलय् हे संविधान निर्माण जुइगु खँय् शंका प्वंकादीगु दु । वय्कलं दलतय्सं आःया थें पहः क्यनातुं च्वंसाः इलय् हे संविधान निर्माण जुइगु खँय् थःत नं शंका दुगु धयादिल ।

संवैधानिक संवाद केन्द्र पाखें पिकागु छगू सफूया विमोचन यानादिसें वय्कलं शासकीय, व्यवस्थापकीय, संघीयता लगायतया विषयलय् दलतय्सं थःथु हठ मत्वःतुतले इलय् हे संविधान निर्माण जुइमफइगु धयादिल ।

संविधान निर्माणय् विज्ञतय् भूमिका महत्वपूर्ण जुइगु धयादिसें आचार्यं राजनीतिक इच्छाशक्ति मदुगु कारण विज्ञतय्त संविधान निर्माण यायेगु ज्याय् दुथ्याकेमफुगु धयादिल । वय्कलं न्हूगु संविधानय् जनजाति, मधेसी, दलित लगायत ल्यूने लाःगु वर्गतय् हकअधिकार सुनिश्चित यायेमाःगु खँय् नं बः बियादिल ।