'सत्ता साझेदारी जुसाः जक न्हूम्ह प्रम'
प्रधानमन्त्री माधवकुमार नेपालं सत्ता साझेदारी बारे खँ मिले मजुइकं न्हूम्ह प्रधानमन्त्री चयन यायेमफइगु दावी यानादीगु दु ।
विराटनगर विमानस्थलय् सोमवाः पत्रकारत नाप खँल्हाबंला यानादिसें प्रधानमन्त्री नेपालं सत्ता साझेदारी व मंकाः सम्झदारी मजुइकं न्हूम्ह प्रम चयन यायेमफइगु धयादिल । वय्कलं दलत दथुइ सहमतिया निंतिं कुतः जुयाच्वंगु खःसां प्रगति जुइमफुगु व दलत दथुइ विश्वासया वातावरण निर्माण जुइमफुगु धयादिल ।
अथेहे प्रधानमन्त्री नेपालं माओवादी प्रति लक्षित यानादिसें थःम्हं राजीनामा ब्यूगु निघौया दुने हे न्हूम्ह प्रधानमन्त्री वइगु व सहमति जुइगु धाःपिं आःया अवस्थया जिम्मेवार जूगु द्वपं बियादिल । नापं वय्कलं माओवादीयात जवाफदेही जुइत नं इनाप यानदिल ।
उखे विराटनगरय् हे जूगु छगू ज्याझ्वलय् उपप्रधनमन्त्री विजयकुमार गच्छदारं शान्ति व संविधानया खँय् सहमति जुसां प्रधानमन्त्रीय विषयसं दलत दथुइ सहमति जुइमफुगु धयादिल । वय्कलं शान्ति व संविधानया प्राय दक्व खँय् दलत दथुइ एकमत जुसां प्रधानमन्त्रीया बारे धाःसा दक्वसियां थःथःगु अडान दुगु धयादिल ।
