संविधानया निंतिं शीर्ष नेतातय् सहलह

येँ (सन्ध्या टाइम्स)/संविधानसभाया थपे जूगु दछि म्यादया प्यला दयेधुंकूगु अवस्थाय् नं दलत सरकार दयेकेगुली जक अलमल जुयाः न्हूगु संविधानया निंतिं छुं हे ज्या मजुल धकाः प्यखेरं आलोचना याना हयेवं थौं संविधानसभाया अध्यक्षः सुवास नेम्वाङं संविधानया निंतिं धकाः नीन्हय्गुलिं दलया शीर्ष नेतातय्त मुँज्या सःतूगु दु। थौं सनिलय् संविधानसभाया भवन न्हूवानेश्वरय् संविधानसभाय् दुथ्याःगु फुक्क हे दलया शीर्ष नेतातय्त सःताः फुक्क हे विषयगत समितियात कयाः ब्वलनाच्वंगु मतभिन्नता चीकेगु नापं संविधान निर्माणया प्रक्रिया न्ह्याकेगु निंतिं हे अथे मंकाः मुँज्या सःतागु खः धकाः अध्यक्ष नेम्वाङं धयादीगु दु ।

मुँज्याय् सहलह ब्याकाः निर्णय यायेफयेमा धकाः न्ह्यसः पौ हे दयेकाः खँ ल्हायेत्यनागु खः धकाः तकं वय्कलं धयादिल। संविधानसभाया झिंछगू विषगत समितिपाखें तयार याःगु प्रतिवेदन मध्ये स्वंगू प्रतिवेदनयात कयाः संविधानसभाय् सहलह जुया पारित यानाः संवैधानिक समितिइ छ्वयेधुंकूगु दुसा मेमेगु प्रतिवेदनयात कयाः सहलह तकं ब्याके फयाच्वंगु मदु। विशेष यानाः राज्य पुनर्संरचनायात कयाः हे दलतय्गु दथुइ विवाव ब्वलंगु खः।
राज्य पुनर्संरचना समितिं तयार याःगु प्रतिवेदनयात कयाः सहलह जुइवं हे विवाद ब्वलना छगू कथं संविधानसभा हे निष्त्रिय याना यंकूगु खः धकाः नं मनूतय्सं धयाच्वंगु दु। आः मूल रुपं राज्यया शासकीय स्वरुप, कार्यकारी अधिकार प्रधानमन्त्रीयात ला कि राष्ट्रपतियात, मन्त्रिपरिषद्या गठन प्रक्रिया नापं मेमेगु खँय् दलतय्गु दथुइ विवाद ब्वलनाच्वंगु दु ।