स्पष्टिकरणबारे अर्थमन्त्री-ओली खँल्हाबंला
प्रधानसेनापतियात सरकारं काःगु स्पष्टिकरण बारे सहलह यायेत अर्थमन्त्री नापं माओवादीया वरिष्ठ नेता डा. बाबुराम भट्टराई बिहिवाः नेकपा एमालेया प्रभावसाली नेता केपी शर्मा ओलीयात नापलानादीगु दु ।
ओली निवास ख्वपय् थ्यंकादिम्ह मन्त्री भट्टराईयात नेता आलीं प्रधानसेनापतियात अवकाश बीगु ताःतया स्पष्टिकरण काःगु धासें माओवादीं कानुन उल्लंघन याःगु द्वपं बियादीगु खः । खँल्हाबंलालिपा पत्रकारत लिसे खँल्हानादीसें नेता ओलीं सेनापति प्रकरणलिपा स्वापू ख्वाउँगु बारे सहलह जूगु कनादिल ।
खँल्हाबंलाया झ्वलय् मन्त्री भट्टराईं प्रधानसेनापति प्रकरणया बारे माओवादीं प्वंकूगु अभिव्यक्ति पार्टीगत जूगुलिं उकी थःपिं ल्यूने वनेमफइगु अडान प्रष्ट यानादीगु खः । लिसलय् ओलीं आः राष्ट्रिय प्राथमिकता कथं शान्ति प्रकृयायात तार्किक निष्कर्षय् थ्यंकेगु, सेना समायोजन व न्हूगु संविधान निर्माण जुइमागु खसां सरकारं मेथाय् हे ध्यान बियाच्वंगु बिचा: प्वंकादिल ।
