आः थीथी हलय् 'बांलाः मय्जु'
येँ/नेपाल चलचित्र विकास बोर्डपाखें घोषणा याःगु ११२९या दकलय् बांलाःगु आदिवासी चलचित्रया राष्ट्रिय सिरपा कायेत ताःलाःगु नेपालभाषाया संकिपा 'बांलाःमय्जु' थ्वहे कार्तिक १ गते शुक्रवाःनिसें सार्वजनिक रुपं क्यननेत्यंगु दु ।
'च्यारिटी शो'पाखें उत्कृष्ट सिरपाः त्याकेत ताःलाःसां हलया समस्या जुयाः उगु संकिपा इलय् हे रिलिज याये मफयाच्वंगु खः। थ्व समस्यायात कयाः स्वनिगः दुनेया हलथुवाःतलिसे सहलह लिपा 'बांलाःमय्जु' क्यनेत थीथी हलथुवाःत सहमत जूगु दु। आः दकलय् न्हापां बालाजु बाइपासय् च्वंगु अष्टनारायण हलं थ्व प्याखं क्यनेत्यंगु दु। थ्वयां लिउ गुण सिनेमा, गंगा हल, गुर्जुधारा सिनेमा, कमल विनायक सिनेमा, बाराही चलचित्र, मयुर चलचित्र, पनौति सिनेमा हल, गोपीकृष्ण सिनेमाय् क्यनेगु नितिं छलफल जुयाच्वंगु खँ निर्माता रामकृष्ण धिनां कनादीगु दु ।
नेपालभाषां क्यनेज्या लिपा थुगु संकिपायात खय् भासं 'सुन्दरी' नामं क्यनेगु ग्वसाः नं जुयाच्वंगु दु। 'बांलाःमय्जु' निर्देशन पवन जोशीं यानादीगु दुसा थुकी जय श्रेष्ठ, मेलिना मानन्धरं मू भूमिका म्हितादीगु दु ।
थुगु संकिपा भव्यकथं ताःलाकेत थ्वहे कार्तिक ५ गते अष्टनारायण हलय् न्हापांगु न्हि प्यंगू शो क्यनेत्यंगु दु। टोखा, बुंग, किपू लगायत थीथी नेवाः लागाय् थुकिया प्रचारप्रसार व टिकट मीगु ज्या यायेत्यंगु दु। निर्माता रामकृष्ण धिनाया कथं थ्व संकिपा २८ लाख चाःचूया लागतय् दयेकूगु खः ।
