थुगुसीया विराट क्वाठण्डौ त्वालय्

ख्वप (सन्ध्या टाइम्स)/विराट नेपालभाषा साहित्य सम्मेलन थुगुसी ख्वया क्वाठण्डौ त्वालय् याइगु जूगु दु। थ्वहे वइगु कौलाथ्व द्वादशि व त्रयोदशि (कार्तिक २ व ३ गते) निन्हुयंकं क्वाठण्डौ त्वालय् विराट नेपालभाषा साहित्य सम्मेलन यायेगु निर्णय जुइधुंकूगु दु ।

सम्मेलन ताःलाकेत कृष्णभक्त सुवालया अध्यक्षताय् नीन्याम्ह दुजः दुगु छगू ग्वाहालि पुचः नं नीस्वंगु दु। उगु पुचःया सचिव कथं रमेश ग्वाछा च्वनादीगु दु। सम्मेलनय् दछियंकं जुइगु विराट गुथिया स्वर्ण जयन्तीया ज्याझ्वः घोषणा याइगु ज्याझ्वः दु। सम्मेलनय् ब्वति कयाः थःथःगु च्वसु ब्वनादीगु निंतिं न्हूपिं व पुलांपिं च्वमिपिंत विराट गुथिं आह्वान याःगु दु। थुगुसी नं विराटं साहित्य व न्वचुया ज्याझ्वः याइगु ग्वसाः दु। थ्वयां न्ह्यः विराटया साधारण सभां थुगुसी थथुबहिली पीगुक्वःगु विराट सम्मेलन यायेगु क्वःछिउगु खःसां आः क्वाठण्डौली यायेत्यंगु खः ।