कांग्रेसं उम्मेदवारी लितकाइमखु : कोइराला
नेपाली कांग्रेस पाखें प्रधानमन्त्रीया निंतिं उम्मेदवार जुयादीम्ह रामचन्द्र पौडेलं थःगु उम्मेदवारी लितमकायेगु खँ धयाच्वंगु इलय् पार्टी सभापति सुशील कोइरालां नं पौडेलया उम्मेदवारी लितमकायेगु खँ धयादीगु दु । वय्कलं आःया अवस्थाय् कांग्रेसं उम्मेदवारी लितकासाः देय् शुन्यताय् वनीगु धयादिसें कांग्रेस निर्वाचनं पिहांमवइगु धयादिल ।
रिपोटर्स क्लवं आइतवाः कोइराला निवास महाराजगंजय् हे याःगु पत्रकार सम्मेलनय् वय्कलं माओवादी सरकारय् वनेत कांग्रेसयात प्रधानमन्त्रीया उम्मेदवारी लितकायेत दबाव बियाच्वंगु द्वपं बियादिल । सभापति कोइरालां शान्ति प्रकृया व संविधान निर्माणयात छखे तयाः माओवादी सत्ताया कासाय् लगे जुयाच्वंगु धासें आपत्ति प्वंकादिल । अथेहे माओवादी व एमाले दथुइ जूगु सहमति प्रति नं आक्रमक जुयादीम्ह कोइरालां थुगु सम्झौता कांग्रेसयात याकःचा यायेगु निंतिं जूगु दावी यानादिल ।
अथेहे मेगू छगू प्रशंगय् वय्कलं सुया नं दवावय् थःम्हं कांग्रेसया पद भागबण्डा मयायेगु स्पष्ट यानादिल । वय्कलं पार्टी दुने सहलह यानाः निर्णय यायेगु धयादिसें आः पार्टी दुने भागबण्ड वा गुट उपगुट पाखें मुक्त जुइगु धयादिल ।
