प्रधानसेनापति गुरुङ बेलायत प्रस्थान
प्रधानसेनापति छत्रमानसिंह गुरुङ थौं सुथय् बेलायत प्रस्थान यानादीगु दु । बेलायती सेनाध्यक्षया ब्वनाय् प्रधानसेनापति गुरुङ झिन्हुन्यंकया बेलायत भ्रमणय् झायादीगु खः । वय्कलं आइतवाः सुथय् ९बजे कतार एयरवेजया उडानं उखे पाखें प्रस्थान यानादीगु खः । प्रधानसेनापति नापं वय्कया जाहान कमला, उपरथी नेत्रबहादुर थापा व प्रमुख सेनानी शिवशंकर गुरुङ नं बेलायत प्रस्थान यानादीगु दु ।
झिन्हुन्यंकया भ्रमणया झ्वलय् प्रधानसेनापति गुरुङं बेलयात समकक्षी जनरल सर पिटर वालनाप खँल्हाबंला यानादीगु ज्याझ्वः दु । अथेहे अन बेलायतया हार्स गार्ड परेडय् फस्ट बटालियन जेन्डर गार्डं वय्कया सम्मान याइगु ज्याझ्वः दु । वय्कलं गोर्खा संग्रालय, गोर्खाजया मू ज्याकू, बेलायती डिफेन्स एकेडेमी व लण्डन स्थित नेपाःया राजदुतावासया भ्रमण नं यानादी ।
थ्वहे दथुइ प्रधानसेनापतिया भ्रमणया पूर्व सन्धाय् अन्तराष्ट्रिय मानवअधिकार संगठन ह्युमन राइट वाचं मानवअधिकार उल्लंघन सम्बन्धी मुद्दाया छानबिनय् ग्वाहालि यायेत नेपाली सेनां स्पष्ट प्रतिबद्धता मप्वंकुतल सैन्य ग्वहालि यायेत बेलायतया ध्यानाकर्षण याःगु दु । बेलायतं नेपाली सेनायात तालिमया ज्वलं आदि ग्वाहालि यानावयाच्वंगु दु ।
