माओवादी-एमाले सहमतिं जनतायात ध्वँ लात : कांग्रेस
नेपाली कांग्रेसं एनेकपा (माओवादी) व नेकपा (एमाले) दथुइ जूगु सहमतिप्रति आपत्ति प्वंकूगु खः । कांग्रेसं उगु सहमति गतिरोध क्वचायेकेत मजुसें उकीया दुनेया रहस्य मेगू हे जूगु द्वपं ब्यूगु दु ।
कांग्रेस संसदीय दलया नेता रामचन्द्र पौडेलं संसदीय कार्यसमितिया दुजःत सहित थौं याःगु पत्रकार सम्मेलनय् माओवादी व एमालें राष्ट्रिय सहमतिया निंतिं सहमति याःगु धाःसां नं सहमतिया खँ रणनीतिक जक जूगु द्वपं बियादिल ।
वय्कलं झलनाथ खनाल व पुष्पकमल दाहालं सहमतिया निंतिं धासें उम्मेद्वारी लितकयाः नं सहमति मखसें बहुमतपाखें विधान संशोधन यायेगु ख्याच्वः बियाच्वंगु धयादिल । नेता पौडेलं थ्वस्वयां न्ह्यः सार्वजनिक याःगु प्याकेजया प्रस्तावय् माओवादी व एमालें सहलहया निंतिं तकं तयार मजूगु धयादिसें सहमति यायेगु इमिगु दुनेया उद्धेश्य मजूगु धयादिल । वय्कलं विशेष स्वार्थय् सहमति यानाः सहमतिया नांमय् जनतायात ध्वँ लाःगु द्वपं नं बियादिल ।
नेता पौडेलं राष्ट्रपतिं ब्यूगु ईया दुने सहमतिय सरकार गठन जुइमफेवं बहुमतया निंतिं पुष्पमकल दाहाल व झलनाथ खनाल व थःगु उम्मेदवारी दर्ता जूगु तर निम्ह नेतातय्सं थःथःगु उम्मेदवारी लितकायेधुंकूगुलिं आः थः नाप जक वैधानिकता ल्यं दनीगु दाबी नं यानादिल ।
