राष्ट्रिय मुद्दाय् सहमति कथं निर्णय यायेत सरकारयात इनाप : झिंखुगू दल
प्रधानसेनापतिया स्पष्टिकरण सम्बन्धय् सहलह यायेत बुधवाः च्वंगु झिंखुगू दलया बैठकं राष्ट्रिय मुद्दाय् दक्वं दलया सहमति व सहकार्य कथं निर्णय यायेत सरकारयात इनाप याःगु दु ।
प्रमुख प्रतिपक्षी दल नेपाली कांग्रेसया ज्याकू सानेपाय् च्वंगु बैठकय् सत्ता साझेदार दल नेकपा एमाले लगायत संविधान सभाय् दुथ्याःगु झिंखुगू दलतय्सं ब्वति काःगु खः । बैठकं प्रधानसेनापतिया स्पष्टिकरण प्रकरणयात न्ह्याः यंकेमबीत सरकारयात सामूहिक दवाब बीगु निर्णय याःगु दु । झिंखुगू दलतय्सं प्रधानसेनापतियात अवकास बीगु सरकारी तयारी लिछ्यायेत एकमत जुयाः न्ह्याःवनेगु धाःगु दु ।
बैठकय् कांग्रेसया पाखें अर्जुन नरिसंह केसी, डा. रमाशरण महत, प्रकासशरण महत लगायत नेतातय्सं ब्वति काःगु खसाः एमाले पाखें महासचिव ईश्वर पोखरेल, सचिव शंकर पोखरेल, फोरमया अध्यक्ष व परराष्ट्रमन्त्री उपेन्द्र यादव, राप्रपा नेपालया शाहीमन्त्री कमल थापा लगायत नेतातय्सं ब्वति काःगु खः ।
झिंखुगू दलं मंगलवाः राष्ट्रपति डा रामवरण यादवया ध्यानाकर्षण यायेधुंकूगु दु ।
