माओवादी इमान्दार जुसाः नेतृत्व स्वीकार : देउवा
नेपाली कांग्रेसया नेता शेरबहादुर देउवां शान्ति प्रक्रिया व संविधान निर्माणया बल्लाःगु आधार न्ह्यब्वयाः इमान्दार जुसाः माओवादीया नेतृत्व स्वीकार यायेत तयार जूगु खँ धयादीगु दु ।
महेन्द्रनारायण निधि प्रतिष्ठानं थौं येँय् याःगु 'गान्धी व अहिंसाया सान्दर्भिकता' विषयसं गोष्ठीलय् नेता देउवां जनतां माओवादीयात तःधंगु दल दयेकूगुलिं शान्ति व संविधान निर्माणय् नं माओवादीया हे तःधंगु जिम्मेवारी दुगु धयादिल । नेता देउवां जनतापाखें निर्वाचित पार्टीयात याकःचा यायेगु बिचाः कांग्रेसया मदुगु स्पष्ट यानादिसें माओवादीं नं संसदवादी दलतय्त यानाच्वंगु शंका आधारहीन जूगु धयादिल ।
शान्तिमन्त्री रकम चेम्जोङं दलत दथुइया तःधंगु अविश्वासया कारणं शान्ति प्रक्रिया व संविधान निर्माणं गति कायेमफुगु धयादिल ।
ज्याझ्वलय् एकीकृत नेकपा (माओवादी)या नेता वर्षमान पुन 'अनन्तं' माओवादी शान्ति प्रक्रियाप्रति प्रतिबद्ध दुगु धयादिल । नेता पुनं असमावेशी राज्य, जातीय, क्षत्रीय व वर्गीय विभेदयात क्वचायेके धुंकाः जक दिगो शान्ति पलिस्था जुइफइगु धयादिल । नेता पुनं जनताया शान्तिया चाहनायात थुइकाः हे माओवादीं अयोग्य लडाकुयात बिनाशर्त छेँय् लितछ्वःगु व आचारसंहिता पारित थंज्याःगु शान्ति प्रक्रियाया ज्या याःगु धयादिल ।
ज्याझ्वलय् भारतीय राजदूत राकेश सुदं शान्ति बिना विकास असम्भव जूगु धयादिसें राजनीतिक रुपान्तरणनापं सामाजिक विभेद क्वचायेकेमाःगु धयादिल । अथेहे भारतीय महिला आयोगया निकं डा. गिरिजा ब्यासं शान्ति प्रक्रियालय् मिसताय् महत्वपूर्ण भूमिका दुगु धयादिसें नेपाःया शान्ति प्रक्रियालय् मिसातय्त नं ब्वति यायेत इनाप यानादिल ।
