थौं विश्व अहिंसा दिवस
थौं विश्व अहिंसा दिवस । नेपालय् नं थुगु दिवस थीथी ज्याझ्वः यानाः हंगु दु । अहिंसावादी नेता माहात्मा गान्धिया बुदिंया न्हियात संयुक्त राष्ट्रसंघं विश्वव्यापी रुपय् अहिंसा दिवस कथं हनेगु निर्णय याःगु कथं अक्टोवर २यात अहिंसा दिवसया कथं हनेगु यानवयाच्वंगु खः ।
थ्वहे झ्वलय् थौं येँय् याःगु छगू ज्याझ्वलय् संविधानसभा अध्यक्ष सुवासचन्द्र नेम्वाङं झिंप्यद्वः निर्देास नेपालीत सीधुंकाः सुरु जूगु शान्ति प्रक्रिया क्वचायेकेत दक्वं पक्ष जिम्मेवार जुइमाःगु धयादिल ।
शान्ति प्रक्रियायात निष्कर्षय् थ्यंकेत सरकार व माओवादी दथुइ जूगु लिप्पांगु सहमतिं आशावादी दयेकूगु धयादिसें नेम्वाङं दलतय् प्रतिवद्धता व व्यवहारय् समानता मदुगुलिं जनताय् निरासा ब्वलंगु धयादिल । दलतय् हे सहमतिया कथं कन्हय् निसें संविधान मस्यौदाया ज्या न्ह्याइगु धयादिसें नेम्वाङं न्हूगु संविधान घोषणा लिपा नेपालय् पूर्ण शान्ति वइगु विश्वास प्वंकादिल ।
ज्याझ्वलय् नेपाली कांग्रेस संसदीय दलया नेता रामचन्द्र पौडेलं सहमतीय राजनीति बिना शान्ति असंभव जुइगु धयादिसें दलत याकन हे सहमतिलय् थ्यनीगु विश्वास प्वंकादिल । माओवादी पाखे लक्षित यानादिसें नेता पौडेलं अझ नं दलतय्के हिंसाया धङधङी दुगु धयादिसें ल्वाभः व धम्किया राजनीतिलय् विश्वास मयायेत इनाप यानादिल ।
अथेहे नेकपा (एमाले)या उपाध्यक्ष बामदेव गौतमं नेपाःया शान्ति प्रक्रसयां विश्व समुदायया हे ध्यानकेन्द्रित याःगु धयादिसें शान्ति प्रकृया याकनं हे निश्कर्षय् थ्यनीगु धयादिल । वय्कलं एमालें प्रस्ताव याःगु राष्ट्रिय सहमतिया एजेन्डाय् दलत वयेमाःगु धयादिसें थुकीं देशयात ऐतिहासिक उपलब्धि पाखे यंकेमाःगु धयादिल ।
