कृषि क्षेत्रय् माक्वः बजेट विनियोजन यायेमा : कृषिमन्त्री
कृषि तथा सहकारी मन्त्री मृगेन्द्रकुमार सिंहं देय्या आर्थिक विकासय् महत्वपूर्ण भूमिका निर्वाह यानाच्वंगु कृषि क्षेत्रया विकासया निंतिं माक्वः बजेट विनियोजन यायेमाःगु खँ धयादीगु दु ।
श्री सम्पन्न बचत तथा ऋण सहकारीया स्वक्वःगु दँ साधारणया लसताय् येँय् थौं जूगु छगू सभाय् मन्त्री सिंहं देय्या कुल ग्राहस्थ उत्पादनया एक तिहाई हिस्सा कयाच्वंगु कृषि क्षेत्रयात सरकारं जम्मा निगू/स्वंगू प्रतिशत जक बजेट बिनियोजन यायेगु यानाच्वंगु धयादिसं कृषियात बजेटया हे मू प्राथामिकताय् तयेमाःगु बिचाः प्वंकादिल ।
सरकारी तथ्याङ कथं खुइन्हय्गू प्रतिशत जनतात कृषिलय् निर्भर जुइगु जुसां नं अप्रत्यक्ष रुपं थ्व ल्याः अप्वः दुगु मन्त्री सिंहया धापू दु । राजनीतिक गतिरोधया हुनिं बजेट ह्येमफयाः विकास निर्माण लगायतया दक्वं न्हिया न्हिथंया ज्या तकं ठप्प जूगुलिं स्वभाविक रुपय् थुकीया लिच्वः कृषिलय् नं लाःगु धयादिल ।
