'राजीनामा बीत दबाव ब्यूपिं आःया अवस्थया जिम्मेवार'

प्रधानमन्त्री माधवकुमार नेपालं थःत राजीनामा बीत दबाव ब्यूपिं हे आःया अवस्थाया जिम्मेवार जूगु द्वपं बियादीगु दु । वयक्लं आः न्हूगु सरकार गठन जुइमफुगु व देय् अन्यौलता पाखे वनाच्वंगुया जिम्मेवारी राजीनामा बीत दबाव ब्यूपिंसं कायेमाःगु धयादिल ।

वय्कलं प्रधानमन्त्रीया उम्मेदवार रामचन्द्र पौडेलयात तत्काल उम्मेदवारी लितमकायेत इनाप यानादिसें उम्मेदवारी लितकाये न्ह्यः वर्तमान समस्या समाधानया निष्कर्षया खाका वयेमाःगु धइगु पौडेलया अडान जायज जूगु धयादिल ।

शनिवाः हेटौंडाय् एमाले कार्यकर्तातय्त सम्बोधन यानादिसें प्रधानमन्त्री नेपालं माओवादीं न्हापा याःगु सम्झौता कार्यन्वयन यायेवं हे समस्या समाधान जुइगु धयादिल । वय्कलं माओवादीं न्हापाया सम्झौता पूमवंकूगु व ल्वाभः मोह क्यंगुलिं हे सहमति जुइ मफुगु द्वपं बियादिल ।