सैन्य भर्नाय् अनियमित ज्या याःगुलिं चक्का जाम

येँ (सन्ध्या टाइम्स)/सैन्य भर्ना छनौटया ज्याय् अनियमित व अन्याय जुयाच्वंगु द्वपं बिसें सुदुरपश्चिमया ल्याय्म्हतय्सं थौं व कन्हय् सुदुरपश्चिम लागाय् चक्का जाम याःगु दु। थुकिं यानाः थौं कैलाली कञ्चनपुर नापं सुदुरपश्चिमय् थौं सुथंनिसें यातायात ठप्प जूगु दु। लिसें सुदूरपश्चिम जुयाः वये�वने यायेमाःगु गाडीत नं अन हे दिनाच्वंगु दु। थुकिं यानाः मोहनि न्यायेकेत छेँय् वनाच्वंपिं सलंसः यात्रु लँय् अलपत्र जुयाच्वंगु दु ।

सुदूरपश्चिम लागाया स्वंगू थासय् नेपाली सेनां सैन्य भर्ना चायेकूगु दु। तर उकी स्थानीय ल्याय्म्ह ल्यासेतय्त छनौटय् मलाकूगुलिं सुदूरपश्चिमया ल्याय्म्ह तम्वयाः आन्दोलनय् कुहांवःगु खः। कैलालीया तेघरी लागाया बरखगण, कञ्चनपुरया चण्डी प्रसाद गण व डोटीया भिमदल यानाः द्वःछिम्ह सेनाया लागिं भर्ना चायेकूगु खः। उकी सुदुरपश्चिमया ल्याय्म्हत दक्ष व सक्षम खःसां नं धाँधली यानाः उमित मकासे मेमेगु थाय्यापिं मनूत कयाः सुदूरपश्चिमयात अन्याय यात धासें स्थानीय ल्याय्म्हतय्सं थ्व आन्दोलन याःगु खः। उमिसं सैन्य भर्ना प्रक्रियाय् नातावाद, कृपावाद, घुसखोरी, पक्षपातपूर्ण व्यवहार व धाँधली जूगु द्वपं बिसें उकिया विरुद्ध जूगु चक्काजामय् आम नागरिकं नं ऐक्यबद्धता प्वंकेत इनाप याःगु दु। सैन्य भर्ना सम्बन्धी खँयात कयाः देशय् आन्दोलन जूगु सम्भवतः थ्वहे न्हापांखुसी जुइमाः ।

चितवन व मेचीइ नं यातायात ठप्प
मेखे अनियमित तरिकां न्हूगु गाडी थपे याःगु विरोधय् पूर्वी चितवनया यातायात ब्यावसायीतय्सं थौं अन चक्का जाम याना बिउगु दु। चक्का जामं चितवनय् थौं सुथंनिसें हे यातायात ठप्प जुयाच्वंगु दु। संचालनय् वयाच्वंगु सवारी साधनयात व्यवस्थित यायेगु पलेसा मेगु सवारी साधन थपे यानाः अव्यवस्थित यायेत्यन धासें यातायात व्यवसायीत आन्दोलन याःगु खः। छहारी यातायात, चितवन माइक्रो, ओमशान्ति यातायातनाप आवद्ध व्यवसायीतय्सं थःपिनिगु मागयात वेवस्ता यासें न्हूगु गाडी थपे याःगु विरोधय् थ्व चक्का जाम याःगु खः। उकथं हे यातायात मजदूरयात आक्रमण याःगु विरोधय् थौं मेची राजमार्गय् नं यातायात व्यवसायीतय्सं चक्का याना बिउगु दु ।