'वाईसिएलया कारणं कानुनी राज्य निर्माणय् पंग'

अमेरीकी राजदूत न्यान्सी जे. पावलं कानुन ल्हातय् कायेगु वाईसीएलया गविधिया कारणं कानुनी राज्य निर्माण यायेगु ज्याय् पंग थनाच्वंगु खँ धयादीगु दु ।

स्वीगुक्वःगु पृथ्वी दिवसया लसताय् बुधवाः पोखराय् जूगु ज्याझ्वलय् ब्वति कायेत झायादिम्ह राजदूतं पत्रकारत लिसे खँल्हासें अराजक गतिविधि, हिंसा, गरिवी व लोडसेडिङ नेपःया विकासय् पंग जूगु बीचाः प्वंकादिल ।

वयेकलं थंज्याःगु घटना व गतिविधिं न्हूगु संविधान निर्माणय् तकं पंग थनेफूगु धासें दलतय्त दक्वं विवाद व असहमतिया समाधान वार्तापाखें यायेत इनाप यानादिल । अमेरिका नेपाःलय् पूर्ण मानव अधिकार सहितया लोकतन्त्रया पक्षय् दुथु जानकारी ब्यूसें वयेकलं शान्ति व पूर्ण लोकतन्त्र स्थापनाया निंतिं अमेरिकां न्ह्यावलें नं ग्वहालि व प्रोत्साहन याना वयच्वंगु दु धयादिल ।