मिडियाय् मिस्तय् सहभागिता बारे अध्ययन
येँ (सन्ध्या टाइम्स)/अस्मिता महिला प्रकाशन गृह व क्रियाशील पत्रकार महिलाया मंकाः ग्वसालय् वंगु बुधवाः ग्लोबल मनिटरिङ प्रोजेक्ट (जीएमएमपी) २०१० या राष्ट्रिय प्रतिवेदन सार्वजनिक यात। ज्याझ्वलय् जेण्डरया विषयय् सञ्चार माध्यमय् गुज्वःकथंया ज्या जुयाच्वंगु दु धइगु खँय् सहलह जूगु खः ।
महिला आयोगया अध्यक्ष नयनकला थापाया प्रमुख आतिथ्यताय् न्ह्याःगु उगु ज्याझ्वलय् क्रियाशील पत्रकार महिलाया संयोजक संगीता लामां लसकुस यानादीगु खःसा अस्मिता महिला प्रकाशन गृहया राष्ट्रिय संयोजकं उगु प्रतिवेदन न्ह्यब्वयादीगु खः। वर्ल्ड एसोसियसन फर क्रिश्चियन कम्युनिकेशपाखें संयोजित १०८ गू देशय् जूगु ग्लोबल मिडिया मनिटरिङ प्रोजेक्ट (जीएमएमपी) अनुसन्धान कथं समाचार व मिडिया कमरेजय् मिसातय्गु अझ नं म्हो जक सहभागिता दु। उगु प्रतिवेदनय् धयातःकथं हलिमय् समाचार ब्वनेगु वा न्यनेगु याइपिं मध्ये ७६ प्रतिशत मिजंत खः ।
ग्लोबल मिडिया मोनिटरिङ प्रोजेक्टया थ्व प्रतिवेदन अरबी, अङ्ग्रेजी, फ्रेन्च व स्पेनिश भाषां सार्वजनिक याःगु खः। उगु प्रतिवेदन कान्तिपुर, गोरखापत्र, नेपाल समाचारपत्र, अन्नपूर्ण पोष्ट, नयाँ पत्रिका, द हिमालयन टाइम्स, द काठमाडौं पोष्ट पत्रिका व रेडियो नेपाल, उज्यालो ९० नेटवर्क, नेपाल एफ.एम.,व नेपाल टेलिभिजनया समाचारया मनिटरिङया लिधंसाय् तयार याःगु खः ।
सन् २००९ नोभेम्बर १० य् नेपाली समाचार मिडियाया अनुगमनं नेपाली मिडियां अझ नं लैंगिक समानतायात प्रवर्धन याइगु व मिसातय्गु सशक्तीकरणयात तिबः बीगु ज्याय् न्ह्याः वनेत अःपुइगु विश्वास मिडिया मनिटरिङ ग्रुपं काःगु खः। उगु हे प्रतिवेदनय् धयातः कथं अन्तर्राष्ट्रिय समाचारय् मिसातय्गु प्रतिनिधित्व २ प्रतिशत व स्थानीय समाचारय् २५ प्रतिशत जक खनेदु। समाचारय् मिजं प्रवक्ता १०१ व २१ विज्ञ दुसा मिसा प्रवक्ताया ल्याः ८ व विज्ञया ल्याः२ जक दु। थथे खयां नं पत्रकारिताय् मिसातय्गु संलग्नता धाःसा अप्वयाच्वंगु खनेदु ।
