अनेरास्ववियु २०क्वःगु सम्मेलन सुरु
नेकपा (एमाले) समर्थित अखिल नेपाल स्वतन्त्र विद्यार्थी युनियन (अनेरास्ववियु)या २०क्वःगु राष्ट्रिय सम्मेलन थनिंनिसें जनकपुरय् सुरु जूगु दु । 'शिक्षा, स्वास्थ्य व रोजगार झीगु मौलिक अधिकार, राष्ट्रिय एकता, दिगो शान्ति व न्हूगु संविधान आर्थिक विकासया आधार' धइगु नारा बियाः थनिंनिसें सम्मेलन सुरु जूगु दु ।
२०क्वःगु सम्मेलनया न्हापांगु दिं थौं जनकपुर चुरोट कारखानाया चौरय् जूगु ज्याझ्वलय् एमाले अध्यक्ष झलनाथ खनाल सहित वरिष्ठ नेता केपी ओली, उपाध्यक्ष बामदेव गौतम, अशोक राई, महासचिव इश्वर पोख्रेल लगायतया एमाले नेतातय्सं ब्वति कयादीगु खः ।
सम्मेलनयात सम्बोधन यानादिसें एमाले अध्यक्ष खनालं धर्मया नांमय् पुलाम्ह जुजु सक्रिय जुइत स्वयाच्वंगु धयादिसें अज्याःगु ज्याय् झी दक्वं सजग जुइमाःगु खँ धयादीगु खः । सम्मेलनयात एमाले वरिष्ठ नेता ओली, अनेरास्ववियुया नकिं रामकुमारी झाँत्री, नेपाल विद्यार्थी संघया अध्यक्ष प्रदिप पौडेल, अनेरास्ववियु क्रान्तिकारीया महासचिव हिमाल शर्मा लगायतं नं सम्बोधन यानादीगु खः ।
सम्मेलन सुरु जुइ न्ह्यः जनकपुरया रामानन्द चोकं छगू र्याली पिहांवःगु खःसा उगु र्याली नगरया थीथी लागा चाहिला जनकपुर चुरोट कारखाना चौरय् थ्यंकाः सभामा हिउगु खः । उलेज्या ज्याझ्वलय् देय् दुने व देय् पिनेया विद्यार्थी संगठनया प्रतिनिधितय् नं ब्वति दुगु खँ अनेरास्ववियुं धाःगु दु ।
सम्मेलनया बन्दसत्र कन्हय् जनकपुर चुरोट कारखानाया हलय् जुइ । सम्मेलनय् देय्न्यंकया २००२म्ह प्रतिनिधितय् ब्वति दु । अनेरास्ववियुया अध्यक्ष पदया निंतिं वर्तमान उपाध्यक्ष सोभियत ढकाल व महासचिव माधव ढुङ्गेल प्यानल सहित मैदानय् कुहांवःगु दु । १९क्वःगु राष्ट्रिय सम्मेलनय् छगू हे प्यानलं ढकाल उपाध्यक्षँ व ढुङ्गेल महासचिवय् निर्वाचित जुयादीगु खः । आः धाःसा ढकालयात एमाले अध्यक्ष झलनाथ खनालया समर्थन दुसाः ढुङ्गेलयात प्रधानमन्त्री माधवकुमार नेपाल व नेता केपी ओलीं समर्थन याःगु दु । स्वन्हु तक न्ह्याइगु सम्मेलनं न्हूगु नेतृत्व ल्ययाः संगठनयात महासंघया ढाँचाय् हिलीगु जूगु दु ।
