शान्तिया निंतिं दलत दथुइ सहमति : प्रम
प्रधानमन्त्री माधवकुमार नेपालं दिगो शान्ति व संविधान निर्माणया निंतिं दलत दथुइ सहमति जरुरी जूगु खँ धयादीगु दु ।
विश्व शान्ति महोत्सव फेडेरेसनं थौं येँय् याःगु शान्ति सम्मेलनय् प्रधानमन्त्री नेपालं नेपाली जनता द्वन्दपाखें मुक्ति व शान्तिया निंतिं लालायीत जूसां दलत दथुइया असहमतिया हुनिं शान्ति झन् तापानावंगु धयादिल ।
प्रधानमन्त्री नेपालं देशय् न्यायपुर्ण, समतामुलक समाज व लोकतान्त्रीक मुल्यमान्यता सहितया संविधान निर्माण आवश्यक जूगु धयादिल । सहकार्य, सहमति, शान्ति व विकास आपसय् सम्वन्धित जूगु धयादिसें प्रधानमन्त्री नेपालं देशयात न्याय व समतामुलक समाजया दिशाय् न्ह्याकेमाःगु हाथ्या पाखें देय् न्ह्यावनाच्वंगु धयादिल ।
ग्लोवल पिस फेडेरेसनया नायः डा. ह्युन जिन मुनं नेपालय् अर्न्तराष्ट्रिय सिद्धान्त सहितया शान्ति व प्रजातन्त्र पलिस्था यायेफुसाः विश्वया हे नमुना जुइगु धयादिल । नेपाली जनताया आकांक्षा कथं नेपालय् याकनं हे शान्ति व संविधान सुनिश्चित जुइगु विश्वास नं वय्कलं प्वंकादिल ।
ज्याझ्वलय् शान्ति मन्त्री रकम चेम्जोङं प्यलाःया दुने शान्ति प्रकृयाया क्वचायेकेत सरकार दृढ दुगु धयादीगु खःसा नेपाल उद्योग वाणिज्य महासंघया अध्यक्ष कुश कुमार जोशीं शान्ति पलिस्थाया निंतिं दक्व छप्पँ जुया न्ह्याः वनेमाःगु खँय् बः बियादीगु खः ।
