शान्ति प्रक्रिया निष्कर्षय् थ्यंकेत जनदबाव जरुरी : प्रकाश
एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' संविधान च्वयेगु व शान्ति प्रक्रियायात निष्कर्षय् थ्यंकेत जनदबाव जरुरी जूगु धयादिसें दबावया निंतिं आमनागरिक व नागरिक समाजयात अपिल यानादीगु दु ।
शान्तिया निंतिं मंकाः अभियान कोक्यापं थौं याःगु 'भावी नेपाल-नागरिकया पहल', विषयसं सम्मेलनय् उपाध्यक्ष प्रकाशं राजनीतिक सहमति मजुइकं आःया राजनीतिक संकट समाधान मजुइगु धयादिल । वय्कलं गतिरोध चीकेगु निंतिं दकलय् न्हापां विदेशी हस्तक्षेप दिकेमाःगु व जनआन्दोलनया लक्ष्यलय् आमसहमति जुइमाःगु स्पष्ट यानादिल ।
ज्याझ्वलय् एमाले नेता प्रदीप ज्ञवालीं जातीय व भाषिक पहिचानया मुद्धायात सम्बोधन मययोकं संघीय, समावेशीय, पूर्ण लोकतान्त्रिक नेपाः निर्माण जुइमफइगु धयादिल । अथेहे ज्याझ्वलय् न्हूगु नेपाः निर्माणया परिकल्पना सम्बन्धी झिंन्यागू कार्यपत्रलय् सहलह जूगु खः ।
