प्रधानमन्त्रीयात साउदी अरेवीयाया उपमन्त्रीं नापलात
प्रधानमन्त्री माधवकुमार नेपालं थौं सुथय् नेपाः भ्रमणय् दीम्ह साउदी अरेवीयाया उपमन्त्री अव्दुल ऐर अन्सारनाप खँल्हाबंला यानादीगु दु ।
म्हिग न्हिनय् नेपाःया परराष्ट्र अधीकारितय्त जानकारी मब्यूसें नेपाः थ्यंकादीम्ह साउदी अरेवीयाया वातावरण उपमन्त्री अव्दुल ऐरनाप साउदीलय् दुपिं नेपाली ज्यामित व उमिगु सुरक्षाया बारे खँल्हाबंला जूगु खः । प्रधानमन्त्रीनापया खँल्हाबंला बारे धाःसा बालुवाटार श्रोतं छुं नं जानकारी ब्यूगु मदुनी ।
उखे नेपाःया निंतिं अमेरीकी कार्यवाहक राजदुत प्याट्रिसिया महेनेइं कांग्रेस सभापति सुशील कोइरालायात नापलाना भिंतुना बियादीगु दु । कार्यवाहक राजदुत महोनेइ कोइराला निवास महाराजगाज थ्यंकाः कांग्रेस सभापतिलय् निर्वाचित जुयादीगु लसताय् अमेरिकी राष्ट्रपति बराक ओबामा व अमेरिकि जनताया पाखें भिंतुना बियादीगु खः । बधाइ बीधुंकाः कार्यवाहक राजदुत महनेइं प्रधानमन्त्री चयनय् खनेदुगु गतिरोध व कांग्रेसया धारणा बारे नं च्यूताः प्वंकादीगु खः ।
लिसःलय् कांग्रेस सभापति कोइरालां कांग्रेस बैधानिक प्रक्रिया व पद्धतियात जोगे यायेगु पक्षय् दुगु खँ धयादीगु खः । वय्कलं आः माओवादी व एमालें उम्मेदवारी लितकायेत यानाच्वंगु कुतः संसदीय पद्धतिया विपक्षय् दुगु नं धयादिल ।
