दुर्घटनाय् ४म्ह सित, २म्ह घाःपाः
येँय् व बाराय् जूगु बिस्कं बिस्कं सतक दुर्घटनाय् लानाः ४म्ह सीगु दु । दुर्घटानाय् लानाः येँ १म्ह सीगु दुसाः १म्ह घाःपाः जूगु दु । उखे बाराया निथाय् जूगु दुर्घटानाय् ३म्ह सीगु दुसाः १म्ह घाःपाः जूगु दु ।
बिहीवाः बहनी येँया दुङ्गेअड्डास्थित समाज अस्पताल न्ह्यने ट्रिपरया ठक्करं येँ महानगरपालिका वडा नम्बर ६या २४दँया समीर महर्जन सीगु दु । बा. २. ख. ७१८७ नम्बरया ट्रिपरं बा. ३७. प. ५०४१ नम्बरया मोटारसाइकलयात ठक्कर नकेवं मोटरसाइकल चालक महर्जन घटनास्थलय् हे मदुगु खः । मोटरसाइकलय् ल्यूने च्वनाच्वंम्ह कन्हैया केसी धाःसा गम्भीर घाःपा जूगु दु । ट्रिपर चालक श्याम बलामीयात धाःसा प्रहरीं नियन्त्रणय् काःगु दु ।
अथेहे वीरगञ्ज पथलैया सतकखण्ड अन्तर्गत बाराया छातापिपराय् ट्रकया ठक्करय् लानाः बारा जितपुरया ४०दँया उमेश शर्मा सीग दु । छातपिपरं नितनपुर पाखे वनाच्वंगु ना. २. ख. २९१० नम्बरया मालबाहक ट्रकं ठक्कर बियाः घाःपा जुम्ह शर्मा वासः याकेगु झ्वलय् शुक्रवाः सुथय् मदुगु खः । ट्रक चालकयात धाःसा प्रहरीं नियन्त्रणय् काःगु खः ।
उखे पूर्वपश्चिम राजमार्ग अर्न्तगत बाराया धनसर पुल नापसं जूगु बस दुर्घटनाय् लानाः २म्ह सीगु दु । दुर्घटनाय् लानाः गम्भीर घाःपा जूपिं ३म्ह मध्ये निम्ह वासः याकेगु झ्वलय् मदुगु खः । दुर्घटनाय् लानाः पर्साया बिरुवागुठी छेँ जुम्ह ४०दँया बबन चौधरी व मकवानपुरया हाँडीखोलाया ४०या नवराज गडतौला सीगु दु ।
