११ दलपाखें नियमावली संशोधनया 'खाका'

येँ (सन्ध्या टाइम्स)/संसदय् न्ह्यानाच्वंगु प्रधानमन्त्रीया चुनाव अन्त्यहिन जूगुलिं आः संसदया कार्य संचालन नियमावली हे संशोधन यानाः जूसां न्हूगु प्रक्रियाय् वनेगु पहल शुरु जूगु दु ।

व्यवस्थापिका संसदय् दुथ्यानाच्वंगु नीन्हय्गू दल मध्ये एकीकृत माओवादी, एमाले, नेकपा (माले) समाजवादी, नेकपा (एकीकृत), नेपाली जनता दल, नेपाः राष्ट्रिय पार्टी नापं झिंछगू दलया म्हिगः जूगु मंकाः बैठकय् माओवादी व एमालेपाखें नियमावली संशोधनया उगु प्रस्ताव हःगु खः।
उगु नियमावलीइ बहुमत महःतले निर्वाचनया प्रक्रिया न्ह्यानां तुं च्वनी धयातःगु दुसा आः उकियात हीकाः 'नियम ७ (८) य् दुगु बहुमत प्राप्त मजूगु अवस्थाय् सभामुखं दकलय् अप्वः मत हःगु निगू दलया प्रस्तावयात हाकनं निर्णायार्थ पेश यायेगु नितिं मेगु मुँज्या सःतेगु व उगु मुँज्याय् निर्णायार्थ पेश जूगु निगू प्रस्ताव मध्ये छुं नं प्रस्तावं बहुमत हये मफुत धाःसा हाकनं अन्तिम पटक निगुलिं प्रस्ताव निर्णायार्थ पेश यासें अनं लिपा उगु प्रक्रिया अन्त्य जूगु घोषणा यायेगु जुइ' धकाः च्वकेगु प्रस्ताव हःगु खः। नियमावली संशोधन यायेगु खःसा उकियात व्यवस्थापिका संसदं पारित याकेमाः ।

उखे चुनावी प्रक्रिया न्ह्याना हे च्वंगु अवस्थाय् नियमावली संशोधन याये दइ मखु धकाः कांग्रेसं धयाच्वंगु दुसा ११ दलं धाःसा निर्वाचन जुयाच्वंगु इलय् जूसां संशोधन याये फइ धयाच्वंगु दु। ११ दलं नियमावलीयात आः थुकथं संशोधन यायेगु नितिं सभामुखलिसे सहलह ब्याकीगु जूगु दु ।