संयुक्त राज्य अमेरिकाया संसदय् इन्टरनेट सेन्सरशीप सम्वन्धी छगू विधयेक प्रस्ताव जूगु दु । थुगु सेन्सरशीपया शिकार कन्हय् नेपालमण्डल डट कम नं जुइफु । थुकिया लिच्वः कथं देय् दुने व पिनेया थीथी समाचार, ब्लग, किपा, संकिपा आदि सकतां नेवाः भासं आःया आः हे ब्वमिपिन्थाय् थ्यंकेगु नेपालमण्डल डट कमया आज्जुइ प्रभावित याइ ।
इन्टरनेट स्वतन्त्रता हनन याइगु थुगु सोपा (SOPA) विधयक विरुद्ध थौं जनवरी १८ तारिख खुन्हु
अंग्रेजी विकिपिडिया,
रेड्डीट,
बोइङ बोइङ,
मोजिल्ला,
वर्डप्रेस आदि हजारौं वेबसाइटं सेवा बन्द यानाः थुकिया विरोध यानाच्वंगु दु ।
फेसबुक,
गुगल, आदि यक्व कम्पनीतय्सं थुकिया विरोध न्हयाकाच्वंगु दु । इन्टरनेट सूचना अधिकार सम्वन्धी नेपालमण्डल डट कमया ब्वमिपिन्त सुसूचित यायेगु ल्याखं व थ्व विधयेकया विरोध स्वरुप नेपालमण्डल डट कम थौं बन्द यानाः थुकिया विरोध न्ह्यब्वया च्वना ।
थुगु विधयेक संयुक्त राज्य अमेरिकाय् न्ह्यब्वयाः अन लागू जुइगु खःसां थकिं संसारभरया इन्टरनेट सुचं कालबिलय् प्रभावित याइ । नेपालमण्डल डट कमया सन्दर्भय् थुकिया यक्व भ्यूअर्सत नेपाःलिपा निगूगु थासय् सं.रा. अमेरिकाय् दुसा नेपालमण्डलया मूख्य सर्भर नं संरा अमेरिकाय् हे दु ।
छु खः सोपा (SOPA) ?
सोपा (Stop Online Piracy Act - SOPA) संयुक्त राज्य अमेरिकाया प्रतिनिधि सभाय् सन् २०११ अक्टोवर २६ य् न्ह्यब्वःगु छगू विधयेक खः । यदि थ्व विधयेक पास जुयाः कानून तयार जुल धाःसा इन्टरनेटय् छगू तःधंगु सेन्सरशीप लागू जुइ । थुकिया लिच्वः कथं युजरतपाखें कन्टेन्ट तयार जुया सञ्चालन जुइगु विकिपिडिया, फेसबुक, यूट्यूब आदि थेन्याःगु वेबसाइट बन्द जुइफइगु स्थिति थ्यंवनी ।
थुगु विधयेक कथं छुं नं सर्वाधिकार (Copyright) थुवाः अमेरिकी कम्पनी चाहे जुलधाःसा थःगु म्ये, किपा आदि सर्वाधिकारया हनन जुल धकाः ब्राजिलपाखें सञ्चालन जुयाच्वंगु वेबसाइट बन्द याना बिइफु । अले सर्च इञ्जिनसाइट गथेकि गुगलं सर्च रिजल्टय् थज्याःगु वबेसाइटया लिन्क डिस्प्ले याये दइमखु । उलि जक मखु थज्याःगु वेबसाइटलिसे छुं नं कथं आर्थिक कारोवार याये दइमखु । अथेहे लोकल आइएसपीपाखें थज्याःगु वेबसाइट ब्लक यायेमाःगु जक मखु प्रोक्सी (proxy) छ्यलाः वेबसाइट स्वयेगु नं गैर कानूनी जूवनी ।
थुकिया छगू सामान्य उदाहरण थथे नं जुइफु कि सुं छम्ह फेसबुक युजरं सुयागुं सर्वाधिकारलिसे ज्वःलाःगु छुं किपा अपलोड यानाबिल धाःसा अमेरिकी सरकारं फेसबुक वेबसाइट हे बन्द याना बिइफु । लुमंकेबहःजु फेसबुकय् थज्याःगु सम्बन्धित किपा, स्टाटस, सूचना आदि हरेक मिनेट करोडौं अपडेट जुयाच्वंगु दु । भिडियो सेयरिङ साइट यूट्यूबय् छन्हुया दुने च्यादँतक मदिक्क स्वयेत गाःगु भिडियो अपलोड जुयाच्वंगु दु । उलि जक मखु थःम्हं खंगु छुं नं खँ व स्यूगु छुं सुचं तुरुन्त ब्लग मार्फत कालबिल यायेगु कथं न्ह्यानाच्वंगु स्वतन्त्र ब्लगिङय् तःधंगु सेन्सरशीप लागू जुइ ।
थुगु सोपा (SOPA) व थ्वलिसे ज्वःलाःगु मेगु विधयेक (PIPA) बारे सिइकेत
थन क्लिक यानादिसँ ।
