देय् दबूया पुचः ब्वाज्या व हिदान

नेवाः देय् दबूं थःगु झिंखुक्वःगु बुदिंया लसताय् थौं पुचः ब्वाज्या व हिदान ज्याझ्वः याःगु दु ।

बुदिंया लसताय् देय् दबूलिं थौं सुथय् ६:३० बजे येँया बसन्तपुरं ब्वाज्या या:गु खः । न्यागू किलोमिटर न्ह्याःगु मिजंतय् ब्वाज्या बसन्तपु, न्हू सतक, जमः, केशर महल, नारणहीति, भद्रकाली, शहीद गेत जुयाः बसन्तपुली वयाः क्वचाःगु खः । अथेहे स्वंगू किलोमिटर न्ह्याःगु मिसातय् ब्वाज्या बसन्तपु, न्हू सतक, रत्नपार्क, भद्रकाली, शहीद गेत जुयाः बसन्तपुली वयाः क्वचाःगु खः ।

मिजं ब्वाज्याय् पाखे ज्ञान प्रसाद भट्टराई न्हाप, प्रकाश पनेरु ल्यू, दिपेन सोमाइ लियां ल्यू व विज्ञान श्रेष्ठ लियां लियां ल्यू लाःगु खः । अथेहे मिसात पाखे सन्तोषी श्रेष्ठ न्हाप, बिनिशा शसी ल्यू, लक्ष्मी कार्की लियां ल्यू व सानबसी केस लियां लियां ल्यू लाःगु खः । ब्वाज्याय् ६३म्ह मिजंत व २८म्ह मिसातय् ब्वति दुगु खः ।

अथेहे देय् दबूलीं थौं हे भुगोलपार्कय् हिदान ज्याझ्वः नं यात । देय् दबूया केन्द्रीय दुजः सुदर्शना दर्शनाधरीं हि बियाः न्ह्याःगु हिदान ज्याझ्वःलय् ४१म्ह मनूतय्सं हिदान याःगु जानकारी देय् दबूया मू छ्याञ्जे रजनी महर्जन‌ं नेपालमण्डल डटकमयात कनादिल।

More Stories Like this