थौं इदुल फित्र हन
थौं इदुल फित्र लच्छितक्क उपवास च्वंपिं मुस्लिम धर्मावलम्बीतय्सं थौं विशेष कथं थ्व पर्व हंगु दु । लच्छितक्क आत्मसंयम व शुद्धिया निंतिं उपवास च्वंपिं इस्लामतय्सं थौं लसता कालबिल याना थ्व पर्व हंगु दु ।
इस्लाम धर्मावलम्बीतय्सं सुथय् म्वः ल्हुयाः प्रार्थना यायेधुंकाः थःथितिपिंलिसे नापलानाः लसतालिसे ईद पर्व हंगु दु । विशेषयानाः थ्व पर्वय् गरीव दुःखीयात दान यायेगु, अल्लाह व मोहम्मदया पवित्र बचंयात लुमंकेगु याइ ।
मुस्लिम समुदायतय्गु पवित्र पर्व इदुल फित्रया लसताय् थौं सरकारं सार्वजनिक बिदा नापं ब्यूगु दु ।
तर इस्लाम समुदाय मध्ये गुलिसिनं कन्हय् जक इदुल फित्र हनीगु जूगु दु । इस्लाम पात्रकथं १४३१ रमजान २९ तारिखया दिं म्हिगःजक नेपाःया पूर्व मेचीनिसें पश्चिम महाकालीतक्कया छु नं थासं चन्द्रमा खनेमदुगुलिं कन्हय् ईद हनेत्यंगु खः ।
