टेलिकमया प्रोत्साहन भत्ताप्रति संसदीय समितिया च्यूताः
व्यवस्थापिका संसदया अर्थ व श्रम सम्बन्ध समितिं नेपाल टेलिकमया कर्मचारीतय्त प्रोत्साहन भत्ता बिइगु व्यवस्थाय् याःगु हिउपाः सम्बन्धी अर्थमन्त्रालयया निर्णयया फाइल अध्ययन याइगु जूगु दु ।
समितिया थौंया बैठकं अर्थमन्त्रालयपाखें फाइल फ्वनाः अध्ययन यायेत उपसमितियात स्वीकृति ब्यूगु दु ।
टेलिकमं कर्मचारीयात थ्व दँ तलब सुविधा बोनस व शेयर नगद लाभांश बाहेक प्रोत्साहनकथं नाफाया प्यंगू दशमलब न्यागू प्रतिशत प्रोत्साहन भत्ता व नीखुगू प्रतिशत स्वयाः अप्वः नाफाया न्यागू प्रतिशत थप भत्ता इनेगु निर्णय याःगु खः ।
बैठकय् सभासद्तय्सं कमजोर गुणस्तरया सेवाया कारण उपभोक्तां छगू हे ज्याया निंतिं छक्वःपतिकं फोन यायेमाःगु बाध्यता सिर्जना याना नाफा कमय् याःगु टेलिकमयात कारबाही यायेमाःगु माग याःगु दु ।
सभासद् विनोद चौधरीं टेलिकमया कर्मचारीयात प्रोत्साहन भत्ता मजुसे दण्डित यायेमाःगु धयादिल ।
