सेना समायोजन लिपा जक अनमिनयात बिदा : गुरुङ
एकीकृत नेकपा (माओवादी) स्थायी समिति दुजः देव गुरुङं बृहत शान्ति सम्झौता सहमतिया दस्तावेज जूगुलिं सरकारं छगू तर्फिरूपं अनमिनया कार्यादेशय् हिउपाः हयेमफइगु खँ धयादीगु दु ।
थौं जूगु छगू साक्षात्कारय् नेता गुरुङं छगू तर्फिरूपं नेपाली सेनायात अनमिनया निगरानीपाखें पिनेतयेत स्वःगुलिं विस्तृत शान्ति सम्झौतायात भंग यायेगु प्रक्रियाय् सरकार वंगु पुष्टि जूगु स्पष्ट यानादिल । देय् संक्रमणकालय् दुगु अवस्थाय् छु नं संवेदनशील विषयलय् सरकारं एकलौटी रुपं निर्णय यायेमज्यूगु धयादिसें वय्कलं वार्तापाखें समस्याया निकास मालेत इनाप यानादिल । अनमिनया भूमिका आःतक्क सकारात्मक व तटस्थ हे दुगु धयादिसें वय्कलं सेना समायोजन मजूत्तले अनमिन नेपालय् हे च्वनेमाःगुलिइ बः बियादिल ।
साक्षात्कारय् शान्ति लिसे पुर्ननिर्माणमन्त्री रकम चेम्जोङं फुक्क दलया सहमतिइ सरकारं नेपाली सेनायात निगरानीपाखें पिनेतय्गु कार्यादेशलिसेया म्याद थपया प्रस्ताव राष्ट्रसंघय् छ्वःगु दावी यानादिल ।
