विकल्पय् वनेमाः सभामुख
सभामुख सुवासचन्द्र नेम्वाङं प्रधानमन्त्री ल्ययेगु निंतिं न्हूगु विकल्पय् वनेत दलत दथुइ सहमति माःगु खँ धयादीगु दु । वय्कलं चुनावी मैदान खाली जूसा न्हूगु विकल्पय् वनेफइगु धयादिल । थीथी संगठनयापाखें लःल्हाःगु ज्ञापन पौ लःल्हाना कयादिसें सभामुख नेम्वाङं न्ह्यानाच्वंगु राजनीतिक गतिरोध अन्त्यया निंतिं गोलमेच सम्मेलन ग्वसाः ग्वयेत माग यानादिल ।
वय्कलं प्रधानमन्त्री ल्ययेगु विद्यमान गतिरोधयात फायेगु निंतिं दलतय्त याकनं सहमति वनेमाःगु धयादिल ।
वय्कलं सरकार गठनय् लिबनाच्वंगुलिं संविधान निर्माणय् असर लाःगु धासें जेठ १४ गते संविधानसभाया म्याद थप यायेगु इलय् दलत दथुइ जूगु स्वंगू बुँदे सहमतिया अक्षरस पालना यायेत इनाप यानादिल ।
मखे संविधानसभा संवैधानिक समितिया सभापति निलाम्वर आचार्यं दलत दथुइ आपालं विषयलय् विवाद जूसां नं राष्ट्रिय मुद्दाय् एकरुपता जुइमाःगु धयादिल । सभासद एकनाथ ढकालया 'अग्रपन्थि लोकतन्त्र' नांया सफूया थौं येँय् उलेज्या यानादिसें सभापति आचार्यं वर्तमानया समस्या समाधानया निंतिं समाजया हरेक तप्कां सक्रिय भूमिका निर्वाह यायेमाःगु धयादिल ।
