'बीपीया मेलमिलापया नीति अःखः वंगुलिं देशय् समस्या'
संसदयात निकम्मा दयेकेत एमालेया भूमिका : पौडेल
नेपाली काँग्रेसया नेतातय्सं काङ्ग्रेस बीपीया मेलमिलापया नीति अःखः वंगुलिं देशय् समस्या वःगु जानकारी ब्यूगु दु । गुइखुक्वःगु बीपी गुइन्हय्क्वःगु जयन्तीया लसताय् काँङ्ग्रेस केन्द्रीय ज्याकू सानेपाय् थौं याःगु ज्याझ्वःलिपा साचारकर्मीतलिसे खँल्हासें नेतातय्सं थंज्याःगु बिचाः प्वंकूगु खः ।
उगु इलय् कांग्रेस महामन्त्री विमलेन्द्र निधी व केन्द्रीय दुजः डा. मिलेन्द्र रिजालं काङ्ग्रेसं बीपीया मेलमिलाप नीति अःखः न्ह्यःने न्ह्याःगु धयादिल । बीपीया मेलमिलापया नीति कःघाःसा देय्या फुक्क समस्या समाधान जुइगु दावी वय्कःपिंसं यानादिल ।
अथेहे महामन्त्री निधि व केन्द्रीय दुजः रिजालं एकीकृत नेकपा (माओवादीं) ल्वाभःया राजनीति मत्वत्तुतले व नागरिक पार्टी मजूत्तले राजनीतिक सहमति जुइमपफइगु धयादिल । मेम्ह कांग्रेस नेता लिसे स्थानीय विकास राज्यमन्त्री गणेशबहादुर खड्कां शान्ति सम्झौता पूर्ण पालना यायेमाःगुलिइ बः बियादिल ।
अथेहे कांग्रेस उपसभापति रामचन्द्र पौडेलं एमाले नायः झलनाथ खनालं प्रधानमन्त्री उम्मेदवार लित कयाः बूगु धयादिल । मैदानय् निरन्तर ल्वानाः च्वनीम्ह उम्मेदवारं बूगु कथं मकायेगु दावी यासें पौडेलं मैदानपाखें ब्यूस्युं वंम्ह मनू बूगु धयादिल । थःगु हे पार्टीया समर्थनपाखें प्रधानमन्त्री जुम्ह माधवकुमार नेपालं सल्लाह हे मयाःसे राजीनामा बियाः थःहे तटस्थ च्वनेगु एमाले देय्या निंतिं गैरजिम्मेवार जूगु वय्कलं धयादिल ।
प्रधानमन्त्रीया उम्मेदवार माओवादी नायः प्रचण्ड व थः बूगु धकाः याःगु प्रचारप्रति कुंख्युंसें वय्कलं थःम्हं जक मजूसे संसदयात नापं निकम्मा दयेकेत एमालेया हे भूमिका जूगु धयादिल ।
