सरकारं शान्ति सम्झौता उल्लंघन यानाच्वन : माओवादी
एकीकृत नेकपा (माओवादीं) नेपाली सेनायात अनमिनया अनुगमनपाखें मुक्त यायेगु सरकारया कुतः पाखें विस्तृत शान्ति सम्झौताया उल्लंघन जूगु दाबी याःगु दु । संयुक्त राष्ट्रसंघया राजनीतिक अधिकारीलिसे थौं सुथय् जूगु नापलाये ज्याय् माओवादी नायः पुष्पकमल दाहाल 'प्रचण्डं' विस्तृत शान्ति सम्झौता अःखः सरकारं अनमिनया कार्यादेश हिलेत च्वःगु धासें कुंखिनादीगु खः ।
प्रचण्ड निवास न्हू बजारय् जूगु नापलाये ज्याय् नायः प्रचण्डं विस्तृत शान्ति सम्झौता कथं हे नेपाली सेना व जनसेनाया अनुगमनयात अनमिनं निरन्तरता बिइमाःगु धयादिल । संयुक्त राष्ट्रसंघ व नेपाल सरकार दथुइ अनमिनया कार्यादेशया विषयलय् विवाद जुयाच्वंगु इलय्ल् राष्ट्रसंघया अधिकारी व प्रचण्ड दथुइया थ्व नापलाये ज्यायात महत्वपूर्ण रुपं स्वःगु दु ।
माओवादीं शान्ति सम्झौता अःखः अनमिनया कार्यादेश म्हो यानाः सरकारं देशय् ल्वापु हयेत स्वःगु शंका याःगु दु । माओवादी नायः प्रचण्डं थौं हे सुथय् राष्ट्रसंघीय सुरक्षा परिषद्या स्वंगू देय् अमेरिका, बेलायत व फ्रान्सया राजदूततलिसे नं अनमिनया विषयलय् वःगु विवादया बारे सहलह यानादीगु दु । वय्कःपिं दथुइ शान्ति प्रकृया संविधान च्वयेगु व समसामयीक राजनीतिक परिस्थितिया बारे सहलह जूगु खः ।
