अनमिनया बारे सरकार व माओवादी दथुइ मंका सहलह
नेपाःस्थित राष्ट्रसंघीय मिसन अनमिनया म्याद थपया निंतिं राष्ट्रसंघयात ब्यागलं ब्यागलं पौ छ्वःगु सरकार व माओवादी दथुइ मंकाः कथं हाकनं पौ छ्वयेगु बारे सहलह जूगु दु ।
सिंहदरवारस्थित प्रधानमन्त्री ज्याकुथिइ जूगु अनौपचारिक सहलहसं सरकारयापाखें संस्कृतिमन्त्री डा. मिनेन्द्र रिजाल व गृहमन्त्री भीम रावल लिसे एकीकृत नेकपा (माओवादी) पाखें न्वकु नारायणकाजी श्रेष्ठ 'प्रकाश' व नेता वर्षमान पुन 'अनन्त'या ब्वति दुगु खः । उगु इलय् अनमिनया म्याद थपया बारे मंकाः रूपं हाकनं पौ छ्वयेगु बारे सहलह जूगु जानकारी माओवादी न्वकु प्रकाशं बियादिल ।
अथेहे अनमिनया कार्यादेश व समयावधिइ ब्यागलं बिचाः लिसे माओवादीं थौं संयुक्त राष्ट्रसंघया सुरक्षा परिषद्यात ब्यागलं पौ छ्वःगु दु । अनमिनया नेपाःस्थित ज्याकूपाखें छ्वःगु पतिइ नेपाली सेना व जनसेनाया अनुगमनयात यथावत तसें अनमिनया म्याद खुला थप यायेमाःगु न्ह्यथनातःगु दु । पतिइ नेपाली सेनाया अनुगमनबारे सरकारं छ्वःगु पौ मौन जूगु धासें असन्तुष्टि प्वंकूगु दु । सरकारं राष्ट्रसंघयात छ्वःगु पतिइ अनमिनया म्याद प्यला थप यायेत इनाप यासें कार्यादेशया बारे स्पष्ट न्ह्यथंगु मदु ।
माओवादी नायः पुष्पकमल दाहाल 'प्रचण्डं' नेपाःस्थित अनमिन ज्याकूया छम्ह कर्मचारीयात नापलानाः पौ लःल्हानादीगु खः । पतिइ नायः प्रचण्डं ल्हाःचिं यानातःगु दु ।
