'संघीयता, गणतन्त्र, धर्मनिरपेक्षताया नितिं प्यानल'

येँ (सन्ध्या टाइम्स)/नेपाली कांग्रेसया वइगु असोज १ गतेनिसें जुइगु झिंनिक्वःगु महाधिवेशनया निंतिं उम्मेदवारी बिउगु शेरबहादुर देउवाया प्यानल देशय् संघीयता, गणतन्त्र व धर्मनिरपेक्षतायात संस्थागत यायेत खः धकाः महामन्त्री विमलेन्द्र निधिं धयादीगु दु।
म्हिगः जक देउवाया नेतृत्वय् प्यानल घोषणा याःगु खःसा महामन्त्री निधिं न्हूगु संविधानय् नेपाःया आदिवासी जनजाति, दलित, मधेशी, कर्णाली व मिसापिनिगु अधिकार सुनिश्चत यायेत नापं निर्णायक थासय् थ्यंकेत दकलय् न्हापां पार्टीया संरचना हे समावेशी जुइमाःगु जुयाः थःपिंसं शेरबहादुर देउवाया नेतृत्वय् समावेशी कथंया केन्द्रीय पदाधिकारीया उम्मेदवार दुथ्याकाः देउवाया नेतृत्वय् प्यानल तयार यानागु खँ कनादिल ।

थौं सुथय् 'सन्ध्या टाइम्स'लिसे खँ ल्हासें वय्कलं नेपाली कांग्रेसयात सशक्त यायेगु नितिं, इलय् हे संघीय लोकतान्त्रिक गणतान्त्रिक संविधान दयेकेगु निंतिं नापं शान्ति प्रक्रिया निष्कर्षय् थ्यंकेगु निंतिं हे चित्रलेखा यादवयात कोषाध्यक्ष, थः महामन्त्री अले वरिष्ठ नेता देउवा सभापति यानाः छगू प्यानल दयेकागु खः धकाः नं दावी यानादिल ।

कांग्रेस स्वयं लोकतान्त्रिक पार्टी जूसां पार्टी दुने आन्तरिक लोकतन्त्रयात अभ्यास यायेगु निंतिं हे थःपिंसं न्हापांखुसी पार्टीया विधानय् व्यापक रुपं संशोधन यानाः महाधिवेशनं तप्यंक हे सभापति, महामन्त्री व कोषाध्यक्ष निर्वाचित यायेगु प्रावधान दयेकागु नापं आदिवासी, जनजाति, मधेशी, दलित नापं मिसापिनिगु निंतिं निश्चित कोटा तयागु खः धकाः नं महामन्त्री निधिं धयादिल। देउवाया पुचलय् विशेष यानाः खुमबहादुर खड्का, गोपालमान श्रेष्ठ नं दुजःया रुपय् दुथ्याःगु दु ।