अनिमिनं अन्याय यात: कोइराला
येँ (सन्ध्या टाइम्स)/नेकां कावा सभापति सुशिल कोइरालां अनमिनं अन्याय याःगु द्वपं बियादीगु दु। अनमिनं शिविरय् दुपिं माओवादी लडाकुयात अपराध यायेगु छुट बियाः नेपाःमिप्रति अन्याय याःगु द्वपं बियादीगु खः। प्रेस युनियन कास्कीं थौं सुथय् याःगु पत्रकार भेटघाट ज्याझ्वलय् न्ववासें वय्कलं अनमिनं नेपालय् शुरुंनिसें हे पक्षपातपूर्ण ब्यवहार यानाच्वंगु द्वपं नं बियादिल। वय्कलं धयादिल, 'अनमिनयात माओवादी लडाकुयात पिने वयाः अपराध याके मबीगु निंतिं कडा जुयाः निगरानी यायेमाः ।'
पत्रकारतय्सं न्यंगु न्ह्यसःया लिसः बिसें वय्कलं तटस्थताया नामय् एमालें हे आःया अवस्थाय् देय्यात अनिर्णया बन्दी दयेकातःगु खः धासें सभामुख सुभास नेम्वाङया भूमिकाप्रति नं असन्तुष्टी प्वंकादिल ।
थ्वहे झ्वलय् प्रम माधव नेपालं अनिमिनया ई व कार्यादेश बारे राष्ट्रसंघय् छ्वइगु प्रस्ताव बारे सहलह ब्याकेत थौं सेना समायोजन विशेष समितिया बैठक सःतूगु दु। उगु समितिइ सरकार, माओवादी, नेपाली सेना दुथ्याः। माओवादी अनमिन लित छ्वयेगु पक्षय् मदुगुलिं म्याद थपे जुइगु सम्भावना दु धाःगु दु ।
