वालुवाटारय् बहनी कालांकुलुं
येँ (सन्ध्या टाइम्स)/म्हिगः खुगूगु चरणया मतदान यानाः नं प्रधानमन्त्री ल्यये मफयेवं आः पार्टीया तटस्थताया नीति तोडे यायेगु बारे सहलह यायेत वालुवाटारय् एमालेया छपुचः खुराफाती धकाः नांजाःपिं नेतातय् विशेष बैठक च्वन। प्रधानमन्त्री माधव नेपाल समेत दुथ्याःगु उगु बैठकय् केपी ओली, ईश्वर पोखरेल, प्रदिप नेपाल, मुकुन्द न्यौपानेया उपस्थिति दुगु खः। उमि दथुइ छु छु खँय् सहमति जूगु धइगु सीमदुनिसां उमिगु वार्ता धाःसा तसकं ततःसलं जुयाच्वंगु खँ सूत्रं धाःगु दु ।
सूत्रया कथं उमिगु सहलहया छगू विषय प्रधानमन्त्रीया राष्ट्र संघ भ्रमण रद्द यायेगु खः लाकि धइगु नं खः। करिब ३ घण्टा तक जूगु उगु सहलह लिपा बहनीसिया डिनर नं अन हे जूगु खः ।
मेखे अनमिनया म्याद गय् यानाः थपे यायेगु व आः प्रमया चुनावय् गय् यानाः वनेगु धइगु बारे खँ ल्हायेत थौं सुथंनिसें एमाले हाइकमाण्डया बैठक च्वंगु दु ।
