थौं देय्न्यंकं म्यानपावर बन्द
येँ (सन्ध्या टाइम्स)/नेपाल वैदेशिक रोजगार व्यवसायी संघया आह्वानय् थौं देय्न्यंकंया म्यानपावर ज्याकू बन्द याःगु दु। इराकय् झिंनिम्ह नेपाःमिया हत्या यायेधुंकाः आक्रोशित पुचलं २०६१ सालया भदौ १६ गते थौंया न्हि कुन्हु येँय्या वैदशिक रोजगार व्यवसायीया सलंसः ज्याकुथी आक्रमण याःगु विरोधय् म्यानपावर व्यवसायीतय्सं थौंया न्हियात हाकुगु दिं कथं लुमंकाः ज्याकू बन्द याःगु खः ।
संघया नायः सोमलाल बाटाजुं व्यवसायीतय्गु असुरक्षा व घटनाया क्षतिपूर्ति मवःगुलिं थौं विरोध कथं व्यवसाय हे बन्द यानागु खँ कनादिल। वय्कलं संघया आह्वानय् येँया मीनभवनय् भेला जुयाः थौं विरोधया ज्याझ्वः यायेगु नापं कन्हय् वैदशिक रोजगार विभागय् ज्ञापनपत्र बीगु जुइ धकाः धाःगु दु। तत्कालिन अवस्थाय् घटनाया छनविन यायेत तत्कालिन सरकारं टोपबहादुर सिंहया संयोजकत्वय् नीस्वंगु समितिं तयार याःगु प्रतिवेदन आः तकं सार्वजनिक याःगु मदुनि ।
