खनालया छेँय् राकेश सूद
येँ (सन्ध्या टाइम्स)/देय्या अन्यौलग्रस्त राजनीतियात कयाः नेकपा (एमाले) या अध्यक्ष झलनाथ खनाल व भारतया राजदूत राकेश सूद दथुइ थौं सहलह जूगु दु ।
राजदूत सूद थौं सुथय् एमाले अध्यक्ष खनालया निवास डल्लुइ वनाः उगु सहलह ब्याकादीगु खः। सहलहया झ्वलय् व्यवस्थापिका संसदय् प्रधानमन्त्रीया चुनाव नापं चुनावय् एमालें म्हिताच्वंगु भूमिकाया बारे खँल्हाबल्हा जूगु खः। वइगु २० गते प्रधानमन्त्रीया खुक्वःगु चुनाव जुइत्यंगु दुसा थुकी एमाले तटस्थ हे च्वनेगु धकाः निर्णय यानातःम्ह अध्यक्ष खनाल हे खः ।
वय्कःपिनि दथुइ घौछि तक वार्ता जूगु खः। उकी खनालं आःया अवस्थाय् सहमतिया विकल्प मदु धयादीगु खःसां राजदूत सुदं धाःसा न्हूम्ह प्रधानमन्त्रीया खँय् जक अप्वः चिउताः तयादीगु खः। लिसें वय्कलं आः जुइगु खुगूगु चरणया चुनाव बारे नं रुची क्यनादीगु खः ।
