'प्रत्यक्ष प्रमया पक्षय् दुगुलिं तटस्थ'
येँ (सन्ध्या टाइम्स)/नेपाली कांग्रेसया नेतातय्सं लिपांगु इलय् वयाः नेकपा (एमाले) प्रत्यक्ष चुनावया माध्यमं प्रधानमन्त्री ल्ययेमाः धइगु पक्षय् दुगुलिं आः जुयाच्वंगु प्रधानमन्त्री चुनावय् तटस्थ च्वंगु खयेमाः धकाः अनुमान यानाहःगु दु। कांग्रेसया नेतातय्सं एमालेया नेता नापं मधेशवादी दलया नेतातलिसे खँ ल्हायेगु इलय् नं एमाले तटस्थ च्वंगुया कारण प्रत्यक्ष प्रधानमन्त्रीया पक्षय् दुगुलिं हे खः धकाः धयाहःगु दु ।
लिपांगु इलय् वयाः संसदीय मान्यता कथं संसदं प्रधानमन्त्री ल्ययेगु प्रक्रियाप्रति हे जनतां नकारात्मक रुपं भावना ब्वलंका हयाच्वंगु तायेकाः कांग्रेसया नेतातय्सं न्ह्यागु जूसां नं प्रधानमन्त्रीया चुनावय् मत बीत मधेशवादी दलतय्त इनाप यानादीगु दु धकाः सूत्रं धाःगु दु। विशेष यानाः मधेशी जनअधिकार फोरमया नेतातय्त नापलानाः सहलह ब्याकेगु झ्वलय् फत धाःसा कांग्रेसयात मखुसा माओवादीयात जूसां मत बिउसां छुं पाइ मखु, थःपिं प्रतिपक्षय् च्वनेत नं तयार धकाः धयाहःगु खः ।
