समर्थन यायेत चिचीधंगु दलयात कांग्रेसया इनाप

नेपाली कांग्रेसं साउन १७ गते जुइगु प्रधानमन्त्रीया निर्वाचनय् थःगु दलया उम्मेदवारयात समर्थन यायेत चिचीधंगु दलयात इनाप याःगु दु ।

शुक्रवाः कांग्रेस संसदीय दलया ज्याकूथी नेकपा (मोल), नेकपा (संयुक्त) व समाजवादी प्रजातान्त्रिक पार्टीया नेतात नाप खँल्हबलां यासें कांग्रेसया उम्मेदवार रामचन्द्र पौडेलयात ग्वाहालि यायेत इनाप याःगु खः । उगु इलय् स्वंगू चिचीधंगु दलया नेतातय्सं आःया अवस्थाय् दक्वं दलत मिलेजुयाः न्ह्याः वनेमाःगु व राष्ट्रिय सहमतिय सरकार बारे सहलह यायेमाःगु धासें थुकीया निंतिं प्रमुख स्वंगू दलं पहल यायेमाःगु खँ धाःगु खः ।

बैठकय् कांग्रेसया शीर्ष नेतात सहित मालेया महासचिव सीपि मौनाली, संयुक्तया अध्यक्ष चन्द्रदेव जोशी व समाजवादी दलया अध्यक्ष प्रेमबहादुर सिंहया उपस्थिति दुगु खः ।