अनमिनया म्याद थप आवश्यक : ल्यान्डग्रेन
नेपाः स्थित राष्ट्रसंघीय मिसन अनमिन प्रमुख करिन ल्यान्डग्रेनं सेनां समायोजन प्रकृया क्वचायेत अनमिनया म्याद थप यायेमाःगु खँ धयादीगु दु । वय्कलं अनमिनया म्याद क्वचायेत ६ हप्ता जक ल्यंदनीगु व उलीया दुने समायोजन प्रकृया क्वमचाइगुलिं म्याद थप यायेमाःगु बिचाः प्वंकादीगु खः ।
बिहीवाः माओवादी उपाध्यक्ष डा. बाबुराम भट्टराईनाप खँल्हाबंला यानादिसें ल्यान्डग्रेनं सरकार गठन प्रकृयाया कारणं सेना समायोजन प्रकृया अवरुद्ध यायेमजूगु खँ धयादिल । अनमिनया म्याद थप यायेगु खँय् सकारात्म जुयादीम्ह भट्टराईं शान्ति प्रकृयां पूर्णता मकातल्ले अनमिनया म्याद थप यायेमाःगु खँ धयादिल ।
वय्कलं माओवादी जनसेनायात विशेष समिति मातहत हयाः समायोजन जुइ चाहे जूपिं व मजूपिंत छुटे यायेत माओवादी तयार जूगु धयादिल । वय्कलं संविधान व शान्ति प्रकृयायात पूर्णता बीत राष्ट्रिय सहमतिया सरकार आवश्वक जूगु खँ नं धयादिल । उगु इलय् अनमिन प्रमुखं नं बहुमतीय प्रक्रिया पाखें सरकार गठन याःसा सरकार कमजोर जुइगु व शान्ति प्रकृयायात पूर्णता बीमफइगु बिचाः प्वंकादीगु खः ।
